नयाँदिल्ली, २८ असोज । जर्मनीको फ्रान्कफर्टबाट दिल्लीका लागि उडेको एयर इन्डियाको एउटा विमानले जयपुर विमानस्थलमा आपतकालीन अवतरण गरेको छ।
विमान अपहरणमा परेको भन्ने सूचना प्राप्त भएपछि आपतकालीन अवतरण गराइएको हो। बिहान ९:०५ बजे एयर ट्राफिक कन्ट्रोल र अहमदाबादस्थित अधिकारीहरूले एयर इन्डियाको उडान एआई २०३० सम्बन्धी आपतकालीन सूचना प्राप्त गरेका थिए। त्यसपछि उक्त उडानलाई जयपुरतर्फ मोडिएको थियो, जहाँ विमानले सुरक्षित रूपमा आपतकालीन अवतरण गरेको हो। सो विमान अघिल्लो रात १०:४५ बजे उडेको थियो।
आपतकालीन अवतरणपछि विमानस्थलमा केही समय हलचल मच्चिएको थियो। विमानस्थलको सुरक्षा कार्यविधिअनुसार जयपुर प्रहरीको बम डिस्पोजल टोली, दमकल र अन्य सुरक्षा टोलीहरू तुरुन्तै घटनास्थलमा पुगेका थिए। राजस्थान प्रहरीका अतिरिक्त महानिर्देशकसहित वरिष्ठ प्रहरी अधिकारीहरू पनि विमानस्थलमा उपस्थित भएका थिए।
प्रारम्भिक जानकारी उद्धृत गर्दै एक स्रोतले जनाएअनुसार विमान ‘मुम्बई फ्लाइट इन्फर्मेसन रिजन’भित्र रहेको बेला पाइलटले ‘स्क्वाक कोड ७५००’ सक्रिय गरेका थिए। यो कोडले गैरकानुनी हस्तक्षेप वा विमान अपहरणको संकेत गर्छ। बोइङ ७८७–९ विमानद्वारा सञ्चालित उक्त उडानले जयपुर अन्तर्राष्ट्रिय विमानस्थलमा आपतकालीन अवतरण गरेपछि सुरक्षा जाँचका लागि विमानलाई ‘आइसोलेसन बे’ (सुरक्षित तथा छुट्टै राखिने स्थान) मा सारिएको थियो।
प्रहरीका सहायक आयुक्त (मालवीय नगर) शिव दयालले समाचार संस्था पीटीआईलाई बताएअनुसार बमको धम्की आएपछि फ्रान्कफर्ट–दिल्ली उडानको आपतकालीन अवतरण गरिएको बारे विमानस्थलका अधिकारीहरूले प्रहरीलाई जानकारी दिएका थिए। त्यसलगत्तै उक्त विमानलाई जयपुरतर्फ मोडिएको थियो।
यद्यपि, विमानमा सवार यात्रुहरूको कुल संख्याबारे तत्काल आधिकारिक जानकारी प्राप्त भएको छैन। यस सम्बन्धमा एयर इन्डियाको आधिकारिक विज्ञप्तिको प्रतीक्षा गरिएको छ।