काजीलाई प्रेममा साथ दिने, प्रेमपत्र लेखिदिने र उसको बिहेको सपना पूरा गराउन खोज्ने पात्र हुन् बिके अर्थात् बिरकाजी विश्वकर्मा। काजीले प्रेमिका भेटे पनि बिहे गर्ने अवसर भने नपाउँदा त्यसको असर बिकेले समेत भोग्नुपर्छ। सधैँ आशावादी रहने बिके आफ्नो बुद्धि पनि लगाउँछन्, तर प्रायः काजीको सहयोगमै खर्चिन्छन्।
प्रेमपत्रमा ‘यो खोलाको कसम, यो हावाको कसम’ भन्दै प्रेमका शब्द कोर्ने बिके कहिलेकाहीँ ‘जघन्य’ र ‘सांघातिक आक्रमण’ जस्ता औपचारिक शब्द प्रयोग गरेर पनि दर्शकलाई हँसाउँछन्। यही रोचक स्वभावका कारण बिके दर्शकमाझ परिचित छन्।
‘कबड्डी’ शृङ्खलाको पाँचौँ भागसम्म आइपुग्दा पनि बिकेको काजीलाई पछ्याउने क्रम रोकिएको छैन। यसैबीच, बिकेको भूमिका निर्वाह गर्दै आएका अभिनेता विजय बरालले आफ्नो पात्र र ‘कबड्डी’को १२ वर्षे यात्रालाई सम्झिएका छन्।
सन् २०१४ मा सुरु भएको ‘कबड्डी’को यात्रा सन् २०२६ सम्म आइपुग्दा १२ वर्ष पूरा भएको उल्लेख गर्दै बरालले समयसँगै पात्र, समाज र मानिसहरूको सोचमा आउने परिवर्तनबारे चर्चा गरेका छन्।
बिकेलाई केवल हास्य पात्रका रूपमा मात्र बुझ्न नहुने बरालको दृष्टिकोण छ। उनका अनुसार बिके आफ्नै समाजमा बाँचिरहेको एउटा पात्र हो, जसका सपना, चाहना, पीडा र सामाजिक संघर्ष छन्। समाजले बिकेलाई कसरी हेर्छ र बिकेले समाजलाई कसरी बुझ्छ भन्ने प्रश्नले उसको जीवनलाई थप अर्थपूर्ण बनाउँछ।
१२ वर्षअघि दर्शकले चिनेको बिके अहिले कहाँ पुगेको होला, उसको सोच र मनस्थितिमा कस्ता परिवर्तन आए होलान् तथा उसले पहिले भोगेको र अहिले देखिरहेको समाजबीच कति फरक होला भन्ने विषयमा आफूले कलाकारका रूपमा खोजी गरिरहेको बरालले बताएका छन्।
समय बित्दै जाँदा पात्रको उमेर मात्र नबढ्ने, उसका अनुभव, सम्बन्ध, पीडा र जीवनप्रतिको दृष्टिकोणसमेत परिवर्तन हुने उनको भनाइ छ। ‘कबड्डी’को संसार काल्पनिक भए पनि त्यसका पात्रहरू वास्तविक समाजका मानिससँग मिल्दोजुल्दो लाग्ने बरालको धारणा छ।
अब कात्तिक ६ गते ‘कबड्डी’का दर्शक फेरि यही संसारमा फर्किन पाउनेछन्। काजी, बिके, छन्त्याललगायत दर्शकले मन पराएका पात्रहरूलाई नयाँ चलचित्र ‘कबड्डी ५ : आफ्टर द फाइनल म्याच’ मा पुनः भेट्न पाइनेछ।