सञ्जय मिश्रा
रौतहट, ८ कात्तिक । धनुषामा पारिवारिक विवादका कारण एक दम्पतीको ज्यान गएको छ। घटनामा श्रीमतीको धारिलो हतियार प्रहार गरी हत्या भएको छ भने हत्याका आरोपित श्रीमान् मृत अवस्थामा फेला परेका छन्। साथै, घटनामा उनीहरूका चार वर्षीय छोरा घाइते भएका छन्।
धनुषाको मिथिला बिहारी नगरपालिका–३, मिथिलेश्वर मौवाहीस्थित माइतीघरमा बस्दै आएकी ३० वर्षीया रिना यादवको शनिबार राति हत्या भएको हो। प्रहरीको प्रारम्भिक अनुसन्धानअनुसार गणेशमान चारनाथ नगरपालिका–४, भरतपुर निवासी ३५ वर्षीय उमेश यादवले आफ्नै श्रीमती रिनामाथि धारिलो हतियार प्रहार गरेका थिए। उमेश मृतक रिनाका श्रीमान् हुन्।
जिल्ला प्रहरी कार्यालय धनुषाका प्रवक्ता डीएसपी ओमप्रकाश खनालका अनुसार उमेश शनिबार राति करिब ९ बजे ससुराली पुगेका थिए। त्यसको केही घण्टापछि आइतबार बिहान १:५० बजेतिर रिनाको घाँटीमा धारिलो हतियार प्रहार भएको सूचना प्रहरीले प्राप्त गरेको थियो।
सूचना पाएलगत्तै इलाका प्रहरी कार्यालय धनुषाधामबाट इन्स्पेक्टर राजेश कुमार शर्माको नेतृत्वमा खटिएको प्रहरी टोली घटनास्थल पुगेको थियो। प्रहरी पुग्दा रिनाको घाँटीमा गम्भीर चोट लागेको र उनको मृत्यु भइसकेको पाइएको थियो।
चार वर्षीय छोरा घाइते, अवस्था सामान्य
घटनाका बेला आमाबुवासँगै सुतेका चार वर्षीय छोरा सम्राट यादवसमेत घाइते भएका छन्। बालकको दाहिने तिघ्रामा धारिलो हतियारले काटेको चोट लागेको प्रहरीले जनाएको छ।
घाइते बालकलाई स्थानीय क्लिनिकमा प्राथमिक उपचारपछि थप उपचारका लागि प्रादेशिक अस्पताल जनकपुर पठाइएको थियो। प्रहरीका अनुसार बालकको अवस्था अहिले सामान्य छ।
खोजीका क्रममा श्रीमान् पनि मृत फेला
श्रीमतीको हत्यापछि फरार भएका उमेशको खोजी गर्ने क्रममा प्रहरीले दुःखद तथ्य पत्ता लगायो। घटनास्थलबाट करिब एक किलोमिटर पश्चिम, मिथिला बिहारी नगरपालिका–२ स्थित सिर्सिया जाने बाटोको दक्षिणपट्टि रहेको आँपको रुखमा झुन्डिएको अवस्थामा उमेशको शव फेला परेको हो।
घटनास्थलबाट रगतले लतपतिएको चक्कुसमेत बरामद गरिएको प्रहरीले जनाएको छ। मृतक रिनाको शव पोस्टमार्टमका लागि प्रादेशिक अस्पताल जनकपुर पठाइएको छ।
डेढ वर्षदेखि सम्बन्धमा तनाव
प्रहरीका अनुसार उमेश करिब डेढ वर्षअघि वैदेशिक रोजगारीबाट फर्किएपछि दम्पतीबीच पटक–पटक विवाद तथा झैझगडा हुने गरेको थियो। यद्यपि, यस घटनाको तत्कालीन कारण र परिस्थितिबारे हालसम्म यकिन भइसकेको छैन।
श्रीमतीको हत्या र त्यसपछि श्रीमान् मृत फेला परेको यस घटनाबारे जिल्ला प्रहरी कार्यालय धनुषाले थप अनुसन्धान अघि बढाएको छ। घटनाको वास्तविक कारण पत्ता लगाउन प्रहरीले विभिन्न पक्षलाई समेटेर अनुसन्धान गरिरहेको छ।