क्षेत्रीय सुरक्षाबारे छलफल गर्न साउदी, टर्की र पाकिस्तानका अधिकारी तेहरान जाँदै
इरानले मध्यपूर्वको सुरक्षा अवस्था र क्षेत्रीय स्थिरताबारे छलफल गर्न साउदी अरेबिया, टर्की र पाकिस्तानका उच्च अधिकारी तेहरान आउने जानकारी दिएको छ। इरानको सर्वोच्च राष्ट्रिय सुरक्षा परिषद्का उपसचिव अली बघेरी कानीले बैठकबारे जानकारी दिए पनि यसको मिति सार्वजनिक गरेका छैनन्।
कानीका अनुसार प्रस्तावित छलफलमा साउदी अरेबियाका रक्षामन्त्री खालिद बिन सलमान, पाकिस्तानका सेना प्रमुख जनरल असीम मुनीर र टर्कीका गुप्तचर प्रमुख इब्राहिम कालिन सहभागी हुनेछन्। उनीहरूले इरानका सुरक्षा अधिकारी मोहसेन रेजाईसँग क्षेत्रीय सुरक्षा र स्थिरताका विषयमा संवाद गर्नेछन्।
इरानी सरकारी टेलिभिजनलाई दिएको अन्तर्वार्तामा कानीले चार देशबीचको संवादले दीर्घकालीन क्षेत्रीय सुरक्षा व्यवस्था निर्माण गर्न सहयोग पुग्ने विश्वास व्यक्त गरेका छन्। पाकिस्तानका सेना प्रमुख मुनीरले गत साता गरेको तेहरान भ्रमणका क्रममा यस्तो बैठकको प्रस्ताव अघि सारिएको उनले बताएका छन्।
यसबीच मध्यपूर्वमा अमेरिका र इजरायलसँग इरानको द्वन्द्वका कारण क्षेत्रीय तनाव बढेको छ। इरानको आणविक कार्यक्रमबारे वासिङ्टन र तेहरानबीच वार्ता भइरहेका बेला फेब्रुअरीदेखि आक्रमण सुरु भएको विवरण समाचारमा उल्लेख छ। अप्रिलमा भएको युद्धविरामले तीव्र सैन्य कारबाही केही हदसम्म रोके पनि तनाव पूर्ण रूपमा अन्त्य भएको छैन।
विशेषगरी हर्मुज जलघाँटीको नियन्त्रणलाई लिएर विवाद कायम छ। विश्वको ठूलो हिस्सा तेल तथा तरलीकृत प्राकृतिक ग्यास यही समुद्री मार्गबाट ढुवानी हुने भएकाले यस क्षेत्रमा हुने कुनै पनि अवरोधले अन्तर्राष्ट्रिय ऊर्जा बजारमा असर पार्न सक्छ।
इरानले जलघाँटीमाथि आफ्नो नियन्त्रण रहेको दाबी गर्दै आएको छ। अनुमति नलिई जलमार्ग पार गर्न खोज्ने जहाजलाई निशाना बनाइएको विवरण पनि सार्वजनिक भएका छन्। यसको जवाफमा अमेरिकाले इरानी बन्दरगाहहरूमा नौसैनिक नाकाबन्दी लगाएको समाचारमा उल्लेख छ।
अमेरिका र इरानबीच द्वन्द्व अन्त्य गर्ने कूटनीतिक प्रयाससमेत कठिन बनेको छ। स्थायी समाधानको अपेक्षा गरिएको सम्झौता अघि बढ्न नसक्दा वार्ता प्रक्रियामा अवरोध आएको बताइएको छ। यमनमा साउदी अरेबिया र इरानको समर्थन प्राप्त हुथी समूहबीच जारी संघर्षले पनि क्षेत्रीय सुरक्षा चुनौतीलाई थप जटिल बनाएको छ।