१० कात्तिक, काठमाडौं । भारतको आसाम राज्यको गुवाहाटीस्थित एक होटलमा गोली चल्दा एक महिलासहित पाँच जनाको मृत्यु भएको छ । घटनामा गोली लागेका अर्का एक जनाको उपचार भइरहेको छ ।
प्रहरीका अनुसार सोमबार राति करिब ९ बजे गुवाहाटीको जीएस रोडस्थित होटल बिलास इनमा गोली चलेको थियो । आसाम प्रहरी मुख्यालयबाट करिब दुई किलोमिटर टाढा रहेको उक्त होटलमा होटलका मालिक र भाडामा लिएर सञ्चालन गर्ने व्यक्तिबीच विवाद भएपछि घटना भएको प्रारम्भिक विवरण छ ।
प्रहरी आयुक्त पार्थ सारथी महन्तका अनुसार घटनामा छ जनालाई गोली लागेको थियो । तीमध्ये पाँच जनाको मृत्यु भएको र एक जनाको उपचार भइरहेको उनले जानकारी दिए ।
समाचार एजेन्सी एएनआईका अनुसार घटनामा संलग्न भएको आशंकामा प्रहरीले एक जनालाई पक्राउ गरेको छ ।
प्रहरी आयुक्त महन्तका अनुसार घटनामा लाइसेन्स प्राप्त .३२ बोरको पेस्तोल प्रयोग गरिएको थियो । प्रहरीले गोली चलाउन प्रयोग भएको हतियारसमेत बरामद गरेको छ ।