आलोचकलाई ‘मासुभातमा बिकेको’ भनेपछि आनी छोइङ डोल्माको नियुक्तिबारे विवाद थप चर्कियो
रुपन्देही । लुम्बिनी विकास कोषको उपाध्यक्षमा नियुक्त आनी छोइङ डोल्माको सार्वजनिक अभिव्यक्तिलाई लिएर विवाद चर्किएको छ। आफ्नो नियुक्तिको विरोध गर्नेहरूलाई चाडपर्वमा मासुभात खाएर आलोचना गरेको आशय व्यक्त गरेपछि उनीमाथि सामाजिक सञ्जालमा थप प्रश्न उठेका छन्।
सरकारले असोज ३० गते आनी छोइङ डोल्मालाई कोषको उपाध्यक्षमा नियुक्त गरेको थियो। उनको नियुक्तिपछि नागरिकता, विगतको पृष्ठभूमि तथा नियुक्तिको औचित्यबारे विभिन्न पक्षबाट प्रश्न उठ्दै आएका छन्। लुम्बिनीका केही स्थानीयले पनि नियुक्तिको विरोध गरेका छन्।
सोमबार सार्वजनिक भिडियो सन्देशमा आनीले आफ्नो नियुक्तिको विरोधप्रति असन्तुष्टि जनाउँदै विरोध गर्नेहरूको आलोचनालाई अर्थहीन ठहर गरेको आशय व्यक्त गरेकी छन्। उनको अभिव्यक्तिपछि आलोचकहरूले प्रश्नको जवाफ दिनुको सट्टा विरोध गर्नेहरूमाथि आरोप लगाएको भन्दै आपत्ति जनाएका छन्।
लुम्बिनी बचाउ महाअभियानका सहसंयोजक रामविकास चौधरीले सार्वजनिक गरेको आलोचनात्मक टिप्पणीमा आनीको आत्मकथामा उल्लेख भएको जन्म र पारिवारिक पृष्ठभूमिबारे स्पष्टीकरण माग गरिएको छ। आत्मकथामा रहेका विवरण गलत भए सार्वजनिक रूपमा सच्याउन तथा विकिपिडियामा उल्लेखित जीवनीबारे पनि स्पष्ट पार्न टिप्पणीमार्फत आग्रह गरिएको छ।
उक्त टिप्पणीमा आनीको जन्म र पारिवारिक पृष्ठभूमिसम्बन्धी विवरण उल्लेख गर्दै उनले प्राप्त गरेको नेपाली नागरिकताको कानुनी आधारबारे प्रश्न उठाइएको छ। सामाजिक योगदानका आधारमा मानार्थ नागरिकता प्राप्त गर्न योग्य हुन सक्ने भए पनि वंशजका आधारमा प्राप्त नागरिकताको विषय स्पष्ट हुनुपर्ने टिप्पणीमा जिकिर गरिएको छ। यद्यपि, यी विषयमा उठेका प्रश्न र आरोपको स्वतन्त्र पुष्टि हुन बाँकी छ।
कलाकार राजाराजेन्द्र घिमिरेले पनि आनीको पछिल्लो अभिव्यक्तिप्रति असन्तुष्टि जनाएका छन्। आलोचना गर्नेहरूलाई मासुभातसँग जोडेर टिप्पणी गर्नु र जातीय तथा धार्मिक द्वन्द्वको सम्भावनाबारे अभिव्यक्ति दिनु उचित नभएको उनको भनाइ छ।
आलोचनालाई व्यक्तिगत रूपमा नलिई उठेका प्रश्नको तथ्यगत जवाफ दिनुपर्ने सुझाव दिँदै आलोचनात्मक टिप्पणीमा आनीलाई लुम्बिनी विकास कोषको उपाध्यक्ष पदबाट राजीनामा दिनसमेत आग्रह गरिएको छ।
यसैबीच, आनीको नियुक्तिको विरोध गर्दै आएका लुम्बिनी बचाउ महाअभियानका अकराम खाँन र स्थानीय बाजिउद्दिन मुसलमान पक्राउ परेको समाचार सार्वजनिक भएपछि लुम्बिनी क्षेत्रमा विवाद थप चर्किएको छ। नियुक्तिको समर्थन र विरोधमा विभिन्न समूह सक्रिय देखिएका छन्।
आनी छोइङ डोल्माको नियुक्तिलाई लिएर नागरिकता, सार्वजनिक अभिव्यक्ति र पदको औचित्यसम्बन्धी प्रश्न उठिरहेका बेला सम्बन्धित निकायबाट यी विषयमा स्पष्ट जवाफ आउने अपेक्षा गरिएको छ।