सत्तारुढ दल राष्ट्रिय स्वतन्त्र पार्टीकी सांसद खुशबु सरकार श्रेष्ठले आर्टिफिसियल इन्टेलिजेन्स (एआई) को बढ्दो प्रभावले जनप्रतिनिधिको औचित्यमाथि नै प्रश्न खडा गरेको बताएकी छन् ।
बिहीवारको बैठकमा उनले प्रविधिको विकासले सांसदहरूलाई विस्थापित वा असान्दर्भिक बनाउन सक्ने भन्दै समयमै सचेत हुन सदनको ध्यानाकर्षण गराएको बताइन् । सांसद श्रेष्ठले एआईलाई एउटा यस्तो शक्ति भनेकी छन् जसलाई न त पार्टीको झण्डा चाहिन्छ, न त चुनावी क्षेत्र र कार्यकर्ता नै । उनका अनुसार एआईले सूचना संकलन, तथ्यांक विश्लेषण र नीति निर्माणमा मानिसभन्दा कैयौँ गुणा छिटो काम गर्न सक्ने क्षमता राख्छ ।
उनले बताइन्, ‘यदि एउटा मेसिनले हामीभन्दा राम्ररी जनताका समस्या बुझ्न सक्छ र छिटो समाधान दिन सक्छ भने, जनप्रतिनिधिका रूपमा हाम्रो भुमिका के रहन्छ ? एआईले हामीलाई चुनावमा हराउनु पर्दैन, उसले हामीलाई असान्दर्भिक बनाइदिए पुग्छ ।’
उनले राजनीतिक दलका परम्परागत शैलीहरू जस्तै–लामो भाषण, ठूला पोस्टर र घोषणापत्रहरू अबको एआई युगमा अर्थहीन हुनसक्ने भन्दै चेतावनी दिइन् । श्रेष्ठले एआईले सक्षम र असक्षमबीच स्पष्ट रूपमा छुटाउने भएकाले सांसदहरूले आफ्नो कार्यशैली बदल्नुपर्ने आवश्यकता औँल्याएको बताइन् । एआईलाई रोक्नु सम्भव नभएको बताउँदै उनले मानवीय जवाफदेहिता र नैतिक निर्णयको पाटो भने मानिसकै हातमा रहनेमा जोड दिइन् । एआई निर्णय लिने साधन मात्र हुनुपर्ने र त्यसको नैतिक जवाफदेहिता जनप्रतिनिधिले नै लिनुपर्ने उनले बताएकी छन् । —न्युज एजेन्सी नेपाल