दक्षिण कोरियाली सेनाले सैन्य सीमा रेखाको दक्षिणतर्फ उत्तर कोरियाले गैरकानूनी रूपमा बारुदी सुरुङ (ल्यान्डमाइन्स) बिछ्याएको आरोप लगाएको छ। गत सेप्टेम्बर २१ मा सीमा क्षेत्रमा भएको विस्फोटमा आफ्ना सैनिकहरू घाइते भएपछि सियोलले प्योङयाङसँग घटनाको जिम्मेवारी लिँदै सार्वजनिक माफी माग्न माग गरेको छ।
दक्षिण कोरियाली सेनाका जोइन्ट चिफ अफ स्टाफका उपाध्यक्ष क्वोन दा–वोनले सोमबार आयोजित पत्रकार सम्मेलनमा अनुसन्धानको निष्कर्ष सार्वजनिक गर्दै सो आरोप लगाएका छन्।
सेप्टेम्बर २६ देखि २९ सम्म दक्षिण कोरियाली सेना र संयुक्त राष्ट्रसंघ कमान्डद्वारा गरिएको संयुक्त स्थलगत अनुसन्धानले उक्त विस्फोटको कारक उत्तर कोरियाले बिछ्याएको प्लास्टिक निर्मित एन्टि–पर्सनल माइन्स भएको पुष्टि गरेको उनले बताए।
घटना सेप्टेम्बर २१ मा डीएमजेडको दक्षिणी भागमा भएको थियो। नियमित गस्तीमा रहेका २५औँ डिभिजनका तीन जना दक्षिण कोरियाली सैनिक विस्फोटमा परी गम्भीर घाइते भएका थिए।
दक्षिण कोरियाले यसलाई ‘उत्तेजक र गैरकानूनी कार्य’ भन्दै उत्तर कोरियालाई तत्काल सम्पूर्ण सुरुङहरू हटाउन चेतावनी दिएको छ।
यता, उत्तर कोरियाले भने सियोलको दाबीलाई ठाडै अस्वीकार गरेको छ। वर्कर्स पार्टी अफ कोरियाको केन्द्रीय समितिका निर्देशक किम यो जोङले अक्टोबर २ मा एक विज्ञप्ति जारी गर्दै उक्त आरोपलाई ‘आधारहीन’ र ‘सियोलले सिर्जना गरेको नाटक’ भन्दै खण्डन गरेकी छन्।
उनले दक्षिण कोरियाले कोरियाली प्रायद्वीपको स्थिति फेरि गम्भीर अवस्थातर्फ धकेल्न खोजेको आरोप लगाएकी छन्।
पछिल्लो घटनाले कोरियाली प्रायद्वीपको सुरक्षा अवस्था थप तनावपूर्ण बनेको छ। दुवै मुलुकबीचको बढ्दो आरोप–प्रत्यारोपले सीमा क्षेत्रमा कायम सैन्य संयमको सम्झौतालाई चुनौती दिएको छ।