काठमाडौँ । सशस्त्र प्रहरीका निलम्बित एआईजी वंशीराज दाहालसँग ‘कनेक्सन’ देखिएका इनम सापकोटालाई प्रहरीले हिरासतमा राखेको छ । असोज १४ गते त्रिभुवन अन्तर्राष्ट्रिय विमानस्थल हुँदै नयाँ दिल्ली जान लागेको अवस्थामा प्रहरीको विशेष ब्युरोले उनलाई पक्राउ गरेको थियो ।
झापा घर भएका सापकोटालाई भद्रकालीस्थित जिल्ला प्रहरी परिसर काठमाडौँको हिरासतमा राखेर प्रहरीले अभद्र व्यवहारसम्बन्धी मुद्दामा अनुसन्धान गरिरहेको छ । सापकोटामाथि अभद्र व्यवहारसम्बन्धी कसुरमा अनुसन्धान भइरहेको जिल्ला प्रहरी परिसर काठमाडौँका एसपी दानबहादुर थापाले बताएका छन् ।
उनले भने, ‘उहाँ हाम्रो हिरासतमा हुनुहुन्छ ।’
पूर्वप्रधानन्यायाधीश चोलेन्द्र शमशेर जबरालाई नियन्त्रणमा लिएर अनुसन्धान गर्दा सापकोटासँग निरन्तर सम्पर्क भएको देखिएको थियो । त्यसपछि सापकोटा पक्राउ परेका हुन् ।
सापकोटासँग सशस्त्र प्रहरी बलका एआईजी वंशीराज दाहालसँग पनि सम्पर्क देखिएको गृह मन्त्रालयका एक उच्च अधिकृतले बताएका छन् । असोज ११ गते बिहान जबरालाई भेट्न एआईजी दाहाल टेकुस्थित उपत्यका अपराध अनुसन्धान कार्यालय पुगेको खुलेको छ ।
प्रहरीले सुरक्षा चुनौती देखेर नियन्त्रणमा लिएको बताएपछि जबरा र उनीसँग सम्पर्कमा देखिएकाहरूमाथि प्रहरीले अनुसन्धान गरिरहेको छ । निलम्बित एआईजी दाहालमाथि गृह मन्त्रालयले जाँचबुझ अधिकृत तोकेर घटनाबारे छानबिन गरिरहेको छ ।
दाहालले कस्तो सूचना चुहाए भन्नेबारे खुलेको छैन । इनमसँग पूर्वप्रधानन्यायाधीश जबरा, एआईजी दाहाल, पुर्पक्षका लागि कारागारमा रहेका व्यवसायी दीपक भट्ट र सुलभ अग्रवालको समेत सम्पर्क देखिएको अनुसन्धानमा संलग्न अधिकृतहरूले बताएका छन् ।
जबरालाई नियन्त्रणमा लिएर उनको मोबाइल जाँच गर्दा बाक्लो सम्पर्क देखिएपछि प्रहरीले इनमलाई खोजेको थियो । जबराको मोबाइल उपत्यका अपराध अनुसन्धान कार्यालयका एसपी शरत थापा र डीएसपी योगराज खतिवडाले जाँच गरेका थिए ।
इनमको मोबाइल जाँच गर्दा थप तथ्य खुलेको प्रहरी अधिकारीहरूले बताएका छन् । इनमले प्रहरी अधिकृतहरूसँग चोलेन्द्र शमशेर जबराले आफूलाई प्रयोग गरेको दाबी गर्दै आएका छन् ।
इनमलाई प्रयोग गरेर जबराले सम्पत्ति शुद्धीकरणको मुद्दामा पुर्पक्षमा रहेका व्यवसायी दीपक भट्ट र सुलभ अग्रवालको मुद्दामा सहजीकरण गर्न खोजेको आशंका गरिएको छ ।
प्रहरी स्रोतका अनुसार चोलेन्द्रले भनेअनुसार इनमले ‘बिचौलिया’को भूमिका निर्वाह गर्दै आएका थिए । पछिल्लो समय भट्ट र अग्रवालको मुद्दा सल्टाउन उनीहरूसँग पुलको काम सापकोटाले गरेको देखिएको प्रहरी स्रोतको दाबी छ । कारागारबाट भट्टले उनलाई फोन गरेको विवरणसमेत प्रहरीले फेला पारेको छ ।