काठमाडौं, २२ असोज । घरायसी विवादका क्रममा श्रीमतीको हत्या गरेको आरोपमा प्रहरीले बाराको निजगढ नगरपालिका–१२ रामथलीका ५५ वर्षीय विजय मोक्तानलाई पक्राउ गरेको छ।
घरायसी विवादका क्रममा उनले बुधबार श्रीमती ४७ वर्षीया सुकुमाया मोक्तानलाई लहराको टुक्राले कुटपिट गरेका थिए। कुटपिटबाट सामान्य घाइते भएकी सुकुमायाको स्थानीय मेडिकलबाट चिकित्सकलाई घरमै बोलाएर जाँच तथा औषधि उपचार गराइएको थियो। राति ८ बजे खाना खाएर सुतेकी सुकुमायालाई बिहीबार बिहान ४ बजे उठाउन खोज्दा नउठेपछि विजयले बिहान ६:४० बजे अस्थायी प्रहरी पोष्ट रतनपुरमा जानकारी गराएका थिए।
जानकारी प्राप्त हुनासाथ घटनास्थल पुगेको प्रहरीले कानुनी प्रक्रिया पूरा गरी शव पोस्टमार्टमका लागि प्रादेशिक अस्पताल बारा पठाएको छ। घटनामा संलग्न मोक्तानलाई नियन्त्रणमा लिएर आवश्यक अनुसन्धान भइरहेको प्रहरीले जनाएको छ।