फिलिपिन्सको राजधानी मनिलाको दक्षिणी क्षेत्रमा रहेको ताल ज्वालामुखीमा बिहीवार साँझ विस्फोट भएको छ । स्थानीय समयअनुसार साँझ ६ः०६ बजे भएको यो ‘माइनर फिएटोम्याग्मेटिक’ विस्फोटले करिब ४ हजार मिटरको उचाइसम्म खरानीको मुस्लो फालेको फिलिपिन्सको ज्वालामुखी तथा भूकम्प विज्ञान संस्थानले जनाएको छ ।
संस्थानका अनुसार पाँच मिनेटसम्म चलेको उक्त विस्फोटपछि ज्वालामुखीको मुखबाट निस्किएको खरानीको मुस्लो दक्षिण–पश्चिमी क्षेत्रतर्फ फैलिएको छ । संस्थानले यस घटनालाई सानो स्तरको विस्फोटका रूपमा वर्गीकरण गरे पनि वरपरका बासिन्दाहरूलाई सचेत रहन आग्रह गरेको छ । फिलिपिन्सको पाँच तहको ज्वालामुखी सतर्कता मापदण्डमध्ये हाल तह १ कायम राखिएको छ ।
ताल ज्वालामुखी फिलिपिन्सका सबैभन्दा सक्रिय ज्वालामुखीहरूमध्ये एक हो । यसअघि सन् २०२० को जनवरीमा भएको ठूलो विस्फोटका कारण करिब ३ लाख ८० हजार स्थानीय बासिन्दा विस्थापित हुनुपरेको थियो भने सयौँ घर, कृषि फार्म र सडकमा क्षति पुगेको थियो ।
प्रशान्त महासागरको ‘रिङ अफ फायर’ क्षेत्रमा अवस्थित भएकाले फिलिपिन्स भौगर्भिक दृष्टिकोणले अत्यन्तै जोखिमपूर्ण मानिन्छ । यस क्षेत्रमा बारम्बार भूकम्प र ज्वालामुखी विस्फोटका घटनाहरू भइरहने गर्छन् । हालको विस्फोटपछि कुनै मानवीय क्षति वा ठूलो भौतिक क्षतिको विवरण प्राप्त नभए पनि स्थानीय प्रशासनले निरन्तर अनुगमन गरिरहेको छ ।