काठमाडौं, २३ असोज । भारतको राजधानी नयाँ दिल्लीमा कक्रोच जनता पार्टीले फेरि आन्दोलन चर्काउने भएको छ ।
मतदाता नामावलीमा हेरफेर गरेर सत्तारुढ भाजपालाई चुनावमा जिताउने गरेको आरोप लगाउँदै सिजेपीले मुख्य निर्वाचन आयुक्त ज्ञानेश कुमारको राजीनामा माग्दै आन्दोलन चर्काएको हो । सिजेपीले शनिबार दिल्लीको जन्तरमन्तरमा विरोध प्रदर्शन गर्ने घोषणा गरेको छ ।
सिजेपीको विरोध प्रदर्शन हुनुअघि दिल्लीमा सुरक्षा कडा पारिएको छ । सिजेपीले देशभरि आफ्ना १० हजार सदस्यलाई हिरासतमा राखिएको दाबी गरेको छ । सिजेपीका अध्यक्ष अभिजित दिपकेले शनिबार जन्तरमन्तरमा विरोध प्रदर्शन गर्ने घोषणा गरेपछि दिल्लीमा २० हजारभन्दा बढी प्रहरी र अर्धसैनिक बल तैनाथ गरिएको छ ।
एक वरिष्ठ प्रहरी अधिकारीका अनुसार विरोध प्रदर्शनका लागि अनुमति दिइएको छैन र निषेधात्मक आदेश लागू भएका छन् । सिजेपी र धेरै विद्यार्थी संगठनहरूले मुख्य निर्वाचन आयुक्त ज्ञानेश कुमारको राजीनामा माग गरेका छन् ।
मतदाता नामावलीको विशेष गहन संशोधनमा अनियमितताका कारण देशभरि लाखौँ मतदाताको नाम हटाइएको आरोप उनीहरूले लगाएका छन् । सिजेपीको आन्दोलन चर्किएसँगै सत्तारुढ भाजपा भने दबाबमा परेको छ । कतै हिंसा भड्किएमा नियन्त्रण गर्न कठिनाइ हुने भन्दै सरकार दमन गर्न हच्केको छ ।