काठमाडौं, २५ असोज । गोरखाको बुढीगण्डकीमा आएको भीषण बाढीले दुईवटा पुलसहित ३५ वटा घर बगाएको छ । आइतबार बिहान साढे ६ बजे लेदो र गेग्रानसहितको बाढी अहिले गोरखाको आरुघाट आइपुग्दैछ ।
बाढीले बुढीगण्डकी जलविद्युत् आयोजनाको क्याम्पसहित एउटा पूरै गाउँ बगाएको छ । बाढीले धादिङको त्रिपुरासुन्दरी गाउँपालिका–२ र गोरखाको आरुघाट गाउँपालिका–९ जोड्ने पक्की पुल बगाएको छ । पुल बगाएपछि दुई पालिकाबीचको आवागमन अवरुद्ध भएको छ भने गोरखासँगको सम्पर्कसमेत टुटेको छ ।
त्रिपुरासुन्दरी गाउँपालिकाका अध्यक्ष राजु उप्रेतीका अनुसार त्यस क्षेत्रका घरमा पसेको बाढीले करिब १५० घरमा क्षति पुर्याएको छ । बाढीले घरहरूमा क्षति पुर्याउनुका साथै दुई पालिकालाई जोड्ने मुख्य पुलसमेत बगाएको छ । मुख्य पुल नै बाढीले बगाएपछि गोरखासँगको सम्पर्कसमेत टुटेको उनले बताएका छन् ।
पुल बगाएपछि स्थानीय बासिन्दालाई आवतजावतमा समस्या भएको छ । बाढीबाट प्रभावित घरपरिवारको क्षति र पुल बगाउँदा भएको भौतिक क्षतिको विस्तृत विवरण आउन बाँकी छ ।
मौसमविद् उज्ज्वल उपाध्यायका अनुसार भदौ १० को भोटेकोशी र आइतबारको बुढीगण्डकीको बाढीको उद्गमस्थलको आकाशीय दूरी बढीमा ७० किलोमिटर देखिन्छ । अर्थात् ४७ दिनको अन्तरालमा नजिकैको स्थानमा दुई ठूला जलवायुजन्य विपद् भएका छन् । भोटेकोशी बाढीको कारण हिमचट्टान पहिरो थियो भने यसको चाहिँ स्थान र कारण यकिन हुन बाँकी छ । तर, स्थानीय तहमा बुझ्दा बुढीगण्डकीको स्रोतभन्दा पनि यस नदीमा मिसिने सानो नदीबाट ठूलो बाढी आएको भन्ने छ ।
जल तथा मौसम पूर्वानुमान महाशाखाले गोरखाको उत्तरी भेगमा वर्षाको कुनै रेकर्ड नभएको जनाएको छ । तर पनि यसरी भीषण बाढी आउनुलाई सामान्य मानिएको छैन ।
स्थानीयवासी, गोरखाको माथिल्लो भेग बुझेका जानकारहरू र काठमाडौंमा उपलब्ध स्रोतहरूले बिही र चुमचेतको बीचमा पहिरो गएको र स्यार खोला थुनिएको, त्यसले बनाएको ताल चुम्लिङ नजिकसम्म विस्तार भएको, बाँध फुटेर बगेको डेब्रिज फ्लडले कटान गरी स्यार र बुढीगण्डकी दोभानमा अर्को पहिरो झर्दा पुनः दोस्रो ड्याम बनेको, माथिल्लो र तल्लो ड्याम थुनिने र भरिने गरेका कारण पटकपटक बाढी चलिरहेको बताएका छन् ।