काठमाडौं । मन्त्री प्रतिभा रावलको निर्देशनअनुसार समस्याग्रस्त सहकारीका बचतकर्ताले पेस गरेका मागदाबीसम्बन्धी विवरण अद्यावधिक गर्ने प्रक्रिया सुरु गरिएको छ। बचत फिर्ता गर्ने कार्यलाई सहज र व्यवस्थित बनाउन समस्याग्रस्त सहकारी व्यवस्थापन समितिको कार्यालयले बचतकर्तालाई २०८३ साल कात्तिक मसान्तभित्र आफ्नो विवरण जाँच गरी आवश्यक संशोधन गर्न अनुरोध गरेको छ।
समितिका अनुसार अनलाइनमार्फत दर्ता गरिएका मागदाबीबापतको रकम राष्ट्रिय भुक्तानी गेटवे प्रणाली प्रयोग गरी सम्बन्धित बचतकर्ताको बैंक खातामा सीधै पठाइने व्यवस्था गरिएको छ। मागदाबीमा उल्लेख भएका नाम, मोबाइल नम्बर वा बचतसँग सम्बन्धित अन्य विवरणमा त्रुटि भए आवश्यक प्रमाण पेस गरेर सच्याउन सकिनेछ।
समितिले प्रत्येक मागदाबीका लागि छुट्टाछुट्टै मोबाइल नम्बर प्रयोग गर्नुपर्ने व्यवस्था गरेको छ। विवरण संशोधन गर्दा प्रमाणीकरणका लागि ओटीपी अनिवार्य गरिएको छ। यदि एउटै मोबाइल नम्बरबाट एकभन्दा बढी मागदाबी दर्ता गरिएको छ भने आवश्यक विवरण खुलाएर समितिको इमेलमार्फत निवेदन दिनुपर्नेछ।
समितिको कार्यालयले सबै बचतकर्तालाई निर्धारित समयसीमाभित्र आफ्ना विवरणहरू अद्यावधिक गर्न आग्रह गरेको छ। विवरण सही र अद्यावधिक भएमा बचत फिर्ताको प्रक्रिया सहज बनाउन सहयोग पुग्ने समितिको अपेक्षा छ।