काठमाडौं, १५ कात्तिक । हाल (अर्नब चक्रवातको अवशेष) न्यून चापीय क्षेत्रका रूपमा पश्चिम नेपालनजिक रहेको र अपराह्नसम्म यसको असर नेपालमा देखिने तथा क्रमिक रूपमा मौसममा सुधार हुँदै जाने सम्भावना रहेको छ। साथै, माथिल्लो वायुमण्डलमा रहेको पश्चिमी न्यून चापीय क्षेत्रको पनि प्रभाव रहेको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार बागमती, गण्डकी, लुम्बिनी र कर्णाली प्रदेशका धेरै स्थानहरूमा मध्यम किसिमको वर्षा भइरहेको छ भने कोशी, मधेश र सुदूरपश्चिम प्रदेशका केही स्थानहरूमा हल्का वर्षा भइरहेको छ।
दिउँसो देशभर आंशिक बदली रहनेछ। कोशी, बागमती, गण्डकी र कर्णाली प्रदेशका हिमाली तथा पहाडी भूभागका एक-दुई स्थानमा हल्का वर्षा वा हिमपातको सम्भावना रहेको छ।
राति भने देशको पहाडी र हिमाली भूभागमा आंशिक बदली रहनेछ। गण्डकी प्रदेशको हिमाली भूभागका एक-दुई स्थानमा हल्का वर्षा वा हिमपातको सम्भावना रहेको छ। तराई भूभाग, उपत्यका तथा खोँचहरूमा बिहानपख केही स्थानमा हुस्सु वा कुहिरो लाग्नेछ।
चिसो बढ्न सक्ने, जोखिमयुक्त स्थान तथा सडक छेउछाउमा पहिरो जान सक्ने, सडक यातायात अवरुद्ध हुन सक्ने तथा सडक एवं हवाई यातायातलगायत दैनिक जनजीवन प्रभावित हुन सक्ने भएकाले आवश्यक सतर्कता अपनाउन र पूर्वतयारी गर्न सर्वसाधारण तथा सबै सरोकारवाला निकायहरूलाई महाशाखाले अनुरोध गरेको छ।