जर्मनीको आर्थिक केन्द्र फ्याङ्कफर्टमा प्रदर्शनकारीहरूले पसलहरूमा तोडफोड र लुटपाट गरेका थिए। अवस्था नियन्त्रणमा लिन प्रहरीले मुख्य सपिङ सडकको ठूलो हिस्सा बन्द गर्नुका साथै भीडलाई तितरबितर पार्न पानीको फोहरा प्रयोग गरेको थियो।
प्रहरीका अनुसार प्रदर्शनकारीहरूले आपतकालीन सेवामा खटिएका कर्मचारीलाई लक्षित गर्दै पटाका, ढुङ्गा र बोतल प्रहार गरेका थिए। घटनामा संलग्न भएको आशंकामा फ्याङ्कफर्टमा केही व्यक्तिलाई पक्राउ गरिएको प्रहरी प्रवक्ताले बताएका छन्।
जेनजीको नेतृत्वमा हजारौँको प्रदर्शन
‘जेनजी रेगेल्ट’ नामक अभियानको आह्वानमा जर्मनीका विभिन्न सहरमा हजारौँ युवाले प्रदर्शन गरेका थिए। जर्मन भाषाको उक्त अभियानको नामको अर्थ ‘अब जेनजीले जिम्मेवारी सम्हाल्नेछ’ भन्ने हुन्छ।
प्रदर्शनकारीहरूले विद्यालय तथा शिक्षा क्षेत्रमा बजेट वृद्धि गर्नुपर्ने, बढ्दो महँगी नियन्त्रण गर्नुपर्ने र सरकारी खर्च कटौतीको नीति पुनर्विचार गर्नुपर्ने माग राखेका थिए। उनीहरूले अनिवार्य सैन्य सेवाको व्यवस्थाको समेत विरोध गरेका थिए।
फ्याङ्कफर्ट, म्युनिख र बर्लिनका अधिकारीहरूका अनुसार प्रदर्शनमा करिब १८ हजार मानिस सहभागी भएका थिए। यो संख्या आयोजकले आफ्नो वेबसाइटमार्फत सार्वजनिक गरेको अनुमानभन्दा झन्डै आधा हो।
समाचार एजेन्सी एएफपीका अनुसार, हिंसात्मक घटना भएपछि फ्याङ्कफर्टको मुख्य व्यापारिक क्षेत्रको ठूलो हिस्सा प्रहरीले नियन्त्रणमा लिएको थियो।
शान्ति र स्वतन्त्रताको पक्षमा उभिएको आयोजकको भनाइ
जेनजी रेगेल्टकी प्रवक्ता लीना फ्रेडरिकले प्रदर्शनको मुख्य उद्देश्य युद्ध र जबर्जस्तीको सट्टा शान्ति तथा स्वतन्त्रताको पक्षमा आवाज उठाउनु रहेको बताएकी छन्।
उनका अनुसार स्वास्थ्य र शिक्षा प्रणालीलाई थप प्रभावकारी बनाउन राज्यले प्राथमिकता दिनुपर्छ। साथै, उनीहरू अनिवार्य सैन्य सेवाको विपक्षमा छन् र सैन्य सेवाको जिम्मेवारी समाजमा न्यायपूर्ण रूपमा बाँडिनुपर्ने पक्षमा छन्।
फ्रान्समा पनि युवा नेतृत्वको प्रदर्शन
जर्मनीमा भएका प्रदर्शनहरू फ्रान्समा युवा पुस्ताको नेतृत्वमा भएका विरोध कार्यक्रमपछि आयोजना गरिएका हुन्।
एएफपीका अनुसार फ्रान्समा पनि शनिबार तीन लाख २० हजारभन्दा बढी मानिस सडकमा उत्रिएर प्रदर्शन गरेका थिए।
जर्मनीमा भने दिउँसो शान्तिपूर्ण रूपमा सुरु भएका प्रदर्शन राति विभिन्न स्थानमा हिंसात्मक बनेका थिए। यसले युवा पुस्ताका माग सम्बोधन गर्ने विषयसँगै सार्वजनिक सुरक्षा कायम राख्ने चुनौतीसमेत थपिएको छ।