१५ कात्तिक, काठमाडौं । नेपालको पर्यटनलाई अन्तर्राष्ट्रिय डिजिटल माध्यममार्फत प्रवर्द्धन गर्ने उद्देश्यले नेपाल पर्यटन बोर्ड र टिकटकको सहकार्यमा सात देशका ट्राभल कन्टेन्ट क्रिएटर नेपाल आएका छन् ।

फ्रान्स, पोर्चुगल, ट्युनिसिया, दक्षिण कोरिया, संयुक्त अरब इमिरेट्स (यूएई), बंगलादेश र श्रीलंकाका क्रिएटरलाई नेपालको प्राकृतिक सुन्दरता, सांस्कृतिक विविधता, साहसिक पर्यटन तथा स्थानीय जीवनशैली विश्वभरका दर्शकमाझ पुर्‍याउने लक्ष्यसहित नेपाल ल्याइएको हो ।

उनीहरूमध्ये यूएई र ट्युनिसियाका तीन जना क्रिएटर फ्लाई दुबईको उडानबाट सिधै पोखरा अन्तर्राष्ट्रिय विमानस्थल पुगेका थिए । उनीहरूलाई पर्यटन बोर्डले पोखरामा स्वागत गरेको थियो भने अन्य क्रिएटरलाई काठमाडौंस्थित त्रिभुवन अन्तर्राष्ट्रिय विमानस्थलमा स्वागत गरिएको थियो ।

नेपाल भ्रमणका क्रममा क्रिएटरहरूले पोखरा, चितवन र बर्दियाका पर्यटकीय क्षेत्रको अवलोकन गर्नेछन् । ती गन्तव्यका प्राकृतिक तथा सांस्कृतिक विशेषता, स्थानीय रहनसहन, पर्यटन गतिविधि र आकर्षण समेटिएका भिडियो तथा डिजिटल सामग्री तयार पारेर टिकटकसहित विभिन्न सामाजिक सञ्जालमा सार्वजनिक गर्ने कार्यक्रम छ ।

यसबाट नेपाललाई विश्व बजारमा आकर्षक पर्यटकीय गन्तव्यका रूपमा स्थापित गर्न सहयोग पुग्ने पर्यटन बोर्डका वरिष्ठ प्रबन्धक सूर्य थपलियाले बताए ।

नेपाल पर्यटन बोर्ड र टिकटकबीच नेपालको पर्यटनलाई विश्वव्यापी रूपमा चिनाउने उद्देश्यले सन् २०२५ अगस्ट १९ मा समझदारी भएको थियो । सोही सहकार्यअन्तर्गत सुरु गरिएको ‘लाइफटाइम एक्सपेरियन्स’ अभियानले नेपालको हिमाली सौन्दर्य, सांस्कृतिक सम्पदा, साहसिक पर्यटन र स्थानीय जीवनशैलीलाई छोटा भिडियोमार्फत अन्तर्राष्ट्रिय दर्शकमाझ पुर्‍याउने लक्ष्य राखेको छ ।

वरिष्ठ प्रबन्धक थपलियाका अनुसार अभियानमा स्वदेशी तथा विदेशी कन्टेन्ट क्रिएटरलाई सहभागी गराई नेपालका विभिन्न गन्तव्यको प्रत्यक्ष अनुभवका आधारमा सामग्री निर्माण गर्न प्रोत्साहित गरिँदै आएको छ । उनीहरूले तयार पारेका सामग्री टिकटकमार्फत प्रचार गरिनेछ । सन् २०२६ मा पनि डिजिटल पर्यटन प्रवर्द्धनका कार्यक्रमलाई निरन्तरता दिइएको उनले जानकारी दिए ।

यसअघि जुन २४ देखि २६ सम्म काठमाडौंमा पर्यटन बोर्ड र टिकटकको संयुक्त आयोजनामा तीनदिने ट्राभल कन्टेन्ट क्रिएसन कार्यशाला आयोजना गरिएको थियो । कार्यशालामा पर्यटन व्यवसायी, डिजिटल क्रिएटर, पदयात्रा व्यवसायी, पर्वतारोही तथा पर्यटन क्षेत्रका अन्य सरोकारवालालाई डिजिटल स्टोरीटेलिङ, भिडियो निर्माण र सामाजिक सञ्जालमार्फत पर्यटकीय गन्तव्यको प्रचार गर्ने विषयमा प्रशिक्षण दिइएको थियो ।

यसपटकको भ्रमणमा बंगलादेशका अनिर्बान कैसर, श्रीलंकाका कसुन सम्पथ देगोडा गमागे, ट्युनिसियाका बाल्किस कसौरी र मोहम्मद जेमिल बेरी तथा यूएईका मोहम्मद नाबिलले पोखराका पर्यटकीय स्थलमा केन्द्रित रहेर सामग्री तयार पार्नेछन् ।

फ्रान्सका जेरेमी ब्युडेटले चितवन पुगेर वन्यजन्तु, राष्ट्रिय निकुञ्ज, थारू संस्कृति र प्रकृतिमा आधारित पर्यटन अनुभव समेट्नेछन् । त्यस्तै, पोर्चुगलका ड्यानियल रोक्स पिन्टो र दक्षिण कोरियाका वङ्यु लीले बर्दियाको प्राकृतिक वातावरण, वन्यजन्तु र समुदायमा आधारित पर्यटनका सम्भावनालाई आफ्ना सामग्रीमा प्रस्तुत गर्नेछन् ।

भ्रमणका क्रममा क्रिएटरहरूले पर्यटकीय गन्तव्यका प्राकृतिक तथा सांस्कृतिक पक्षसँगै स्थानीय पर्यटन व्यवसाय, आतिथ्य सेवा, खानपान, साहसिक गतिविधि र पर्यटकले अनुभव गर्न सक्ने मौलिक विशेषतालाई पनि समेट्ने थपलियाले बताए ।

डिजिटल माध्यमबाट गरिने यस्तो प्रचारले वास्तविक यात्रा अनुभव, आकर्षक दृश्य र व्यक्तिगत कथामार्फत सम्भावित पर्यटकलाई नेपाल भ्रमणका लागि प्रेरित गर्ने अपेक्षा गरिएको छ । विशेषगरी युवापुस्तामाझ लोकप्रिय टिकटकका छोटा भिडियोले नयाँ पर्यटकीय गन्तव्यको पहिचान बढाउन र भ्रमणको निर्णय लिन पर्यटकलाई सहयोग पुर्‍याउन सक्ने विश्वास बोर्डको छ ।

डिजिटल प्लेटफर्म र सिर्जनात्मक सामग्रीलाई पर्यटन प्रवर्द्धनको माध्यम बनाउँदै आएको बोर्डले अन्तर्राष्ट्रिय कन्टेन्ट क्रिएटरसँगको सहकार्यलाई नेपालको पर्यटन कथा विश्व बजारसम्म पुर्‍याउने रणनीतिका रूपमा अघि बढाएको छ ।

यस अभियानबाट पोखरा, चितवन र बर्दियाको अन्तर्राष्ट्रिय पहिचान विस्तार हुनुका साथै स्थानीय पर्यटन व्यवसाय तथा समुदायले समेत लाभ लिन सक्ने अपेक्षा गरिएको छ ।