काठमाडौं । जापानका लागि प्रस्तावित नेपाली राजदूत जिज्ञानकुमार थापाको नियुक्तिबारे टुंगो लगाउन संसदीय सुनुवाइ समितिको बैठक बोलाइएको छ । सोमबार दिउँसो ३ बजे सिंहदरबारमा बस्ने बैठकले थापाको नाम अनुमोदन गर्ने वा नगर्ने विषयमा निर्णय गर्ने जनाइएको छ ।
यसअघि असोज २८ गते भएको संसदीय सुनुवाइका क्रममा थापासँग जापानको स्थायी बसोबास अनुमति (पीआर) रहेको विषय उठेपछि समितिले निर्णय प्रक्रिया अघि बढाएको थिएन ।
सुनुवाइका क्रममा थापाले आफूले जापानको पीआर त्यागिसकेको स्पष्टीकरण दिएका थिए । तर, सांसदहरूले संविधानको धारा २९१ मा रहेको व्यवस्थासँगै पीआर त्यागेको समयावधिबारे थप स्पष्टता खोजेका थिए ।
यस विषयमा आधिकारिक जानकारी लिन समितिले परराष्ट्र मन्त्रालयमार्फत जापान सरकारसँग विवरण माग गरेको थियो । तर, हालसम्म जापान सरकारबाट त्यसको जवाफ प्राप्त भएको छैन ।
आवश्यक विवरण नआइसकेको अवस्थामा नै सोमबार समितिको बैठक बस्न लागेको हो । बैठकमा थापाको राजदूत नियुक्तिसम्बन्धी विषयमा थप निर्णय हुने अपेक्षा गरिएको छ ।