। प्रधानन्यायाधीश र अन्य न्यायाधीशसँग सम्बन्धित विषयमा सञ्चारमाध्यममा प्रकाशित समाचारप्रति सर्वोच्च अदालतको फूलकोर्टले चासो व्यक्त गरेको छ । सोमबार बसेको सबै न्यायाधीश सम्मिलित पूर्ण बैठकले संविधानको सर्वोच्चता र कानुनी शासनप्रति आफ्नो प्रतिबद्धता दोहोर्याउँदै सम्बन्धित विषयमा निष्पक्ष अनुसन्धान गर्न आग्रह गरेको हो ।
सर्वोच्च अदालतका प्रवक्ता डा. अशोककुमार क्षेत्रीले जारी गरेको विज्ञप्तिमा संविधान र कानुनको सर्वोच्चता न्यायपालिकाको अटल मान्यता रहेको उल्लेख छ । बैठकले यस सिद्धान्तप्रति प्रतिबद्ध रहन सबै पक्षलाई आग्रह गरेको छ ।
सार्वजनिक रूपमा आएका विषयमाथि पूर्वाग्रहरहित, स्वतन्त्र र निष्पक्ष ढंगले संविधान तथा कानुनअनुसार छानबिन गर्न पनि फूलकोर्टले सम्बन्धित निकायको ध्यानाकर्षण गराएको छ । अनुसन्धानबाट प्राप्त सत्यतथ्यसहितको निष्कर्ष सकेसम्म छिटो सार्वजनिक गर्न बैठकले आग्रह गरेको छ ।
सञ्चारमाध्यममा प्रकाशित तथा प्रसारित समाचारसँग सम्बन्धित अनुसन्धानका क्रममा कानुनले तोकेको जवाफदेहिता पूरा गर्न र आवश्यक सहयोग उपलब्ध गराउन न्यायपालिका प्रतिबद्ध रहेको विज्ञप्तिमा उल्लेख छ ।
न्यायपालिका नागरिकको आस्था र विश्वासमा आधारित संस्था भएकाले यससँग सम्बन्धित समाचार प्रकाशन तथा प्रसारण गर्दा संवेदनशील हुन सञ्चारमाध्यमलाई आग्रह गरिएको छ । छानबिनको निष्कर्ष आउनुअघि नै कसैलाई दोषी ठहर्याउने वा लाञ्छित गर्ने तथा न्याय सम्पादनमा अवरोध पुग्ने सामग्री सार्वजनिक नगर्न फूलकोर्टले अनुरोध गरेको छ ।
त्यस्तै, सार्वजनिक भएका समाचारबाट प्रभावित नभई नियमित रूपमा न्यायिक जिम्मेवारी निर्वाह गर्न सबै अदालतमा कार्यरत न्यायाधीश तथा कर्मचारीलाई बैठकले आग्रह गरेको छ ।
