काठमाडौं । विपक्षी दलहरूले सरकारले अध्यादेशको सहारा लिएर शासन सञ्चालन गर्न खोजेको आरोप लगाउँदै तत्काल संघीय संसद्को अधिवेशन आह्वान गर्न माग गरेका छन्।
सिंहदरबारस्थित नेपाली कांग्रेसको संसदीय दलको कार्यालयमा बसेको विपक्षी दलहरूको बैठकले संसद् अधिवेशन तत्काल बोलाउन सरकारसँग माग गर्ने निर्णय गरेको हो।
बैठकपछि कांग्रेस संसदीय दलका नेता भीष्मराज आङ्दाम्बेले सुनसरीको कप्तानगञ्जमा भएको घटना, गृहमन्त्रीको सम्पत्तिसम्बन्धी प्रतिवेदन सार्वजनिक नगरिएको विषय र सरकारले अध्यादेशमार्फत शासन सञ्चालन गर्न खोजेको विषयमा छलफल भएको जानकारी दिए।
सरकारको कार्यशैलीले संसद्को औचित्यमाथि नै प्रश्न उठ्ने अवस्था सिर्जना गरेको आङ्दाम्बेको भनाइ थियो। संसद्लाई सक्रिय बनाएर छलफल र निर्णय गर्ने प्रक्रियालाई अघि बढाउनुपर्नेमा जोड दिँदै विपक्षी दलहरूले तत्काल संघीय संसद्को अधिवेशन आह्वान गर्न माग गरेका हुन्।