पीआरसम्बन्धी विवाद र संसदीय सुनुवाइमा उठेका प्रश्नपछि जिज्ञानकुमार थापाले राजदूत बन्ने प्रक्रिया अघि नबढाउने निर्णय गरेका हुन्।
काठमाडौं । जापानका लागि प्रस्तावित नेपाली राजदूत जिज्ञानकुमार थापाले आफ्नो नाम फिर्ता लिएका छन्। संसदीय सुनुवाइ समितिका सभापति बोधनारायण श्रेष्ठले सोमबार सिंहदरबारमा बसेको समितिको बैठकमा थापाले नाम फिर्ता लिएको जानकारी दिएका हुन्।
थापाको जापानमा स्थायी बसोबास अनुमति (पीआर) रहेको विषय उठेपछि उनको संसदीय सुनुवाइ प्रक्रिया यसअघि रोकिएको थियो। असोज २८ गते भएको सुनुवाइका क्रममा सांसदहरूले उनको पीआर र त्यसलाई त्यागेको समयबारे प्रश्न गरेका थिए।
सुनुवाइका क्रममा थापाले जापानको पीआर त्यागिसकेको स्पष्टीकरण दिएका थिए। तर, सांसदहरूले संविधानको धारा २९१ मा रहेको व्यवस्थासँगै पीआर त्यागेको अवधिबारे थप स्पष्टता खोजेका थिए।
विवादको विषयमा यकिन गर्न समितिले परराष्ट्र मन्त्रालयमार्फत जापान सरकारसँग आधिकारिक विवरण मागेको थियो। उक्त विवरण जापानस्थित नेपाली दूतावासमार्फत परराष्ट्र मन्त्रालयमा पठाइएको थियो।
यसबीच थापाले आफ्नो नाम फिर्ता लिएपछि जापानका लागि प्रस्तावित राजदूत नियुक्तिको प्रक्रिया उनको हकमा टुंगिएको छ।