कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको विराटनगरका लागि शेखले तेस्रो नम्बरमा ब्याटिङ गर्दै टोलीको इनिङ्स सम्हालेका थिए।
खेलको सुरुवातमै ओपनर शान जयासूर्या टोलीको स्कोर २ रन हुँदा आउट भएपछि शेख क्रिजमा आएका थिए। त्यसपछि उनले अर्का ओपनर लोकेश बमसँग मिलेर उत्कृष्ट ब्याटिङ गर्दै शतकीय साझेदारी गरेका हुन्।
चालु संस्करणको एनपीएलमा यो पहिलो शतकीय साझेदारी हो। समग्र एनपीएल इतिहासमा भने यो १४औँ शतकीय साझेदारी बनेको छ। प्रतियोगिताको पहिलो संस्करणमा सात र दोस्रो संस्करणमा छ पटक शतकीय साझेदारी भएको थियो।
विराटनगर किंग्सका खेलाडीले एनपीएलमा गरेको यो दोस्रो शतकीय साझेदारीसमेत हो। यसअघि दोस्रो संस्करणमा लोकेश बम र मार्टिन गप्टिलले पोखरा एभेन्जर्सविरुद्ध दोस्रो विकेटका लागि १३२ रनको साझेदारी गरेका थिए। उक्त साझेदारी विराटनगरको अहिलेसम्मकै उच्च साझेदारी हो।
यता, एनपीएल इतिहासकै सर्वाधिक साझेदारीको कीर्तिमान भने पोखरा एभेन्जर्सका आन्द्रे गौस र दिनेश खरेलको नाममा छ। उनीहरूले लुम्बिनीविरुद्ध पहिलो विकेटका लागि अविजित १७६ रनको साझेदारी गरेका थिए।