केही दिनअघिसम्म दर्शनार्थीको उपस्थिति न्यून रहेको पाथीभरा क्षेत्रमा मौसम अनुकूल भएसँगै भक्तजनको चाप बढेको हो। समितिको तथ्याङ्कअनुसार आइतबार ६४० र सोमबार ३ हजार ५९० जनाले मन्दिर दर्शन गरेका थिए। नवरात्र सुरु हुँदा ज्योतिषीय मान्यता तथा वर्षाको सम्भावनाका कारण भक्तजनको आवागमन कम भए पनि मौसममा सुधार आएपछि दर्शनार्थीको सङ्ख्या तीव्र रूपमा बढेको हो।
पाथीभरा पुग्ने अधिकांश भक्तजनले रातिको समयमा पदयात्रा सुरु गर्ने गरेका छन्। टाढाबाट आउने दर्शनार्थीहरू प्रायः पहिलो दिन काफ्लेपाटी वा ठूलोफेदीमा बास बसेर भोलिपल्ट बिहान मन्दिरतर्फ लाग्छन्। कतिपयले राति १ देखि २ बजेको बीचमा यात्रा सुरु गर्छन् भने केही भक्तजन रातभर हिँडेर बिहानै मन्दिर पुग्ने गरेका छन्।
तल्लोफेदीसम्म सवारीसाधनमा पुगेपछि सुरु हुने पदयात्रामा ठूलोफेदी पुग्न करिब एक घण्टा लाग्छ। त्यसपछि कान्छीथान हुँदै मन्दिरसम्म पुग्न थप दुईदेखि तीन घण्टा पैदल हिँड्नुपर्छ। समुद्री सतहबाट ३ हजार ७९४ मिटर उचाइमा रहेको पाथीभराको पदमार्ग उकालो र कठिन छ। चिसो मौसम तथा भौगोलिक कठिनाइका बाबजुद धार्मिक आस्था र मनोकामना पूरा हुने विश्वासले भक्तजनलाई यात्रा गर्न प्रेरित गरिरहेको छ।
तेह्रथुमबाट पाथीभरा दर्शनका लागि पुगेका डिकेन कार्कीले पनि राति २ बजेदेखि पदयात्रा सुरु गरेका थिए। लामो समयदेखिको दर्शन गर्ने चाहना पूरा गर्न कठिन बाटो पार गरेको बताउँदै उनले देवीप्रतिको विश्वासले यात्रामा उत्साह थपेको उल्लेख गरे।
उनले आफू राति २ बजेदेखि हिँडेर दर्शनका लागि आएको र देवीप्रतिको आस्थाका कारण मनमा चिताएको कुरा पूरा हुने आशा रहेको बताए।
मन्दिरका पुजारीका अनुसार नवरात्रको समयमा राति १ बजेदेखि दिउँसो २ बजेसम्म दर्शनार्थीको चाप बढी हुने गरेको छ। यात्रालाई सहज बनाउन पदमार्गका विभिन्न स्थानमा विश्रामस्थल र बासको व्यवस्था गरिएको छ। त्यस्तै, उकालो बाटो हिँड्न कठिन हुने ज्येष्ठ नागरिक, अशक्त तथा बालबालिकासहित आउने परिवारलाई सहयोग पुर्याउन भरियाहरू पनि परिचालन गरिएका छन्। उनीहरूले यात्रुका सामान बोक्नुका साथै आवश्यक सहयोग गर्दै आएका छन्।
दर्शनार्थीको सङ्ख्या बढेसँगै पाथीभरा आसपासका होटल तथा आवासस्थलमा पनि चाप बढेको छ। फुङलिङ बजार, सुकेटार, काफ्लेपाटी, तल्लोफेदी र माथिल्लोफेदीका होटलहरूमा पाहुनाको सङ्ख्या बढेको छ। एकैदिन हजारौँ भक्तजन पुग्न थालेपछि होटल सञ्चालक तथा यातायात व्यवसायीलाई व्यवस्थापन गर्न चुनौती थपिएको छ।
भक्तजनको बढ्दो आवागमनले मेची राजमार्ग र तमोर करिडोरमा समेत सवारीसाधनको चाप बढाएको ताप्लेजुङका पत्रकार कृष्ष फुरुम्बोले जानकारी दिए।
स्थानीय विक्रम लिम्बूका अनुसार भाकल पूरा हुने र मनोकामना सिद्ध हुने धार्मिक विश्वासका कारण पाथीभरा आउने भक्तजनको सङ्ख्या वर्षेनि बढिरहेको छ। नेपालका विभिन्न जिल्लाका साथै भारतबाट समेत ठूलो सङ्ख्यामा दर्शनार्थी आउने गरेका छन्। धार्मिक महत्त्वसँगै यहाँको प्राकृतिक सुन्दरता र हिमाली भूगोलले पनि पर्यटकलाई आकर्षित गरेको उनले बताए।
पाथीभरा यात्राका क्रममा कञ्चनजङ्घा हिमशृङ्खलाको मनमोहक दृश्य अवलोकन गर्न पाइने भएकाले पनि यस क्षेत्रको आकर्षण बढ्दै गएको छ। धार्मिक यात्रासँगै प्राकृतिक सौन्दर्यको अनुभव लिन चाहनेहरूका लागि पाथीभरा महत्त्वपूर्ण गन्तव्य बन्दै गएको छ। नवरात्रबाहेक अन्य चाडपर्व, सार्वजनिक बिदा र मौसम अनुकूल भएका समयमा पनि यहाँ दर्शनार्थीको उपस्थिति रहने गरेको छ।
पाथीभरा क्षेत्र धार्मिक आस्थाको केन्द्र मात्र नभई पूर्वी नेपालको पर्यटन र स्थानीय अर्थतन्त्रसँग जोडिएको प्रमुख गन्तव्यसमेत हो। भक्तजनको चहलपहलले होटल, पसल, यातायात र अन्य स्थानीय व्यवसायमा आर्थिक गतिविधि बढाएको छ।
यद्यपि, दर्शनार्थीको सङ्ख्या बढ्दै जाँदा पदमार्गको सुधार, विश्रामस्थलको विस्तार, सरसफाइ, स्वास्थ्य सेवा र यात्रु सुरक्षामा थप ध्यान दिनुपर्ने आवश्यकता देखिएको छ। बढ्दो धार्मिक तथा पर्यटकीय गतिविधिलाई व्यवस्थित बनाउन आवश्यक पूर्वाधार र सेवासुविधाको विकास गर्न सके पाथीभरा क्षेत्रको महत्त्व अझ विस्तार हुने अपेक्षा गरिएको छ।