काठमाडौँ । अमेरिकाको मिसिसिपी राज्यमा जारी सिनेट निर्वाचनको मतगणना निकै प्रतिस्पर्धात्मक बनेको छ। रिपब्लिकन पार्टीकी वर्तमान सिनेटर सिन्डी हाइड–स्मिथ र डेमोक्रेटिक उम्मेदवार स्कट कोलोमबीच मतान्तर झिनो हुँदा निर्वाचनको नतिजाप्रति चासो बढेको छ।
पछिल्लो मतगणनामा कोलोम र हाइड–स्मिथबीचको अन्तर एक हजार १०० भन्दा केही बढी मत रहेको छ। मतगणना अझै पूरा नभएकाले अन्तिम परिणाम सार्वजनिक हुन बाँकी छ। <
सन् २०१८ मा निर्वाचित हाइड–स्मिथ अमेरिकी कंग्रेसमा मिसिसिपीको प्रतिनिधित्व गर्ने पहिलो महिला हुन्। उनी पुनः सिनेटमा पुग्ने प्रयासमा छिन्। अर्कोतर्फ, उनका प्रतिस्पर्धी कोलोम लामो समयदेखि कानुनी क्षेत्रमा काम गर्दै आएका व्यक्ति हुन्।
को हुन् स्कट कोलोम ?
स्कट कोलोम हाल मिसिसिपीमा जिल्ला सरकारी वकिलका रूपमा कार्यरत छन्। उनले यसअघि सरकारी वकिल र न्यायाधीशका रूपमा पनि जिम्मेवारी सम्हालिसकेका छन्।
अमेरिकाका पूर्वराष्ट्रपति जो बाइडेनले सन् २०२२ मा उनलाई मिसिसिपीको उत्तरी जिल्लाका लागि संघीय न्यायाधीश नियुक्त गर्न मनोनयन गरेका थिए। तर, सिनेटर हाइड–स्मिथले उनको नियुक्तिको विरोध गरेपछि सिनेटबाट मनोनयन प्रक्रिया अघि बढ्न सकेन।
मिसिसिपीको सिनेट निर्वाचन राष्ट्रिय राजनीतिक वृत्तमा समेत चर्चाको विषय बनेको छ। डेमोक्रेटिक पार्टीका केही प्रभावशाली नेताहरूले कोलोमको पक्षमा चुनावी प्रचार गरेका छन्। पूर्वराष्ट्रपति बिल क्लिन्टन, पूर्वउपराष्ट्रपति कमला ह्यारिस र जर्जियाका सिनेटर राफेल वार्नकले उनको समर्थनमा प्रचारप्रसार गरेका थिए।
चुनावी अभियानका क्रममा कोलोमले हाइड–स्मिथको एउटा अभिव्यक्तिलाई पनि आफ्नो प्रचारको विषय बनाएका थिए। गाईको मासुको मूल्य बढेको भन्दै असन्तुष्टि जनाएका मिसिसिपीका नागरिकलाई हाइड–स्मिथले ‘अर्को प्रोटिन रोज्न’ सुझाव दिएकी थिइन्।
उनको यही भनाइलाई व्यङ्ग्य गर्दै कोलोमले ‘अर्को सिनेटर रोज्नुस्’ भन्ने सन्देशसहित टेलिभिजन विज्ञापन तयार पारेका थिए। उक्त विज्ञापनले राष्ट्रिय स्तरमै चर्चा पाएको थियो।
कोलोम निर्वाचित भएमा करिब चार दशकपछि मिसिसिपीबाट अमेरिकी सिनेटमा पुग्ने पहिलो डेमोक्रेटिक उम्मेदवार बन्नेछन्। साथै, पुनर्निर्माण काल (रिकन्स्ट्रक्सन एरा) पछि उक्त राज्यबाट सिनेटमा निर्वाचित हुने पहिलो अश्वेत सांसदसमेत हुनेछन्।
मिसिसिपीमा सातौँ पुस्तादेखि बसोबास गर्दै आएको परिवारका सदस्य कोलोम दुई सन्तानका पिता हुन्।