फिल्म प्रदर्शनमा आएपछि दर्शकहरूले सामाजिक सञ्जालमार्फत आफ्ना प्रतिक्रिया सार्वजनिक गरिरहेका छन्। यसै क्रममा कथामा समावेश गरिएको उक्त युद्ध दृश्यले विशेष चर्चा पाएको हो।
फिल्ममा वनवासका क्रममा भगवान् रामसँगै रहेकी सीतालाई युद्धभूमिमा उत्रिएको देखाइएको छ। उक्त दृश्यमा उनले श्रीरामसँग मिलेर १४ हजार राक्षसलाई पराजित गरेको चित्रण गरिएको छ।
तर, केही सामाजिक सञ्जाल प्रयोगकर्ताले मूल रामायणमा सीता स्वयं युद्धमा सहभागी भएको यस्तो प्रसङ्ग नरहेको दाबी गर्दै फिल्मको प्रस्तुतिमाथि प्रश्न उठाएका छन्।
अर्कोतर्फ केही दर्शकले भने फिल्मको दृश्यलाई लिएर फरक धारणा राखेका छन्। यससँगै सीताको चरित्र र युद्धमा उनको भूमिकाबारे सामाजिक सञ्जालमा पक्ष–विपक्षमा बहस भइरहेको छ।
रणवीर कपुर, साई पल्लवी र यश मुख्य भूमिकामा रहेको ‘रामायण’ नोभेम्बर ५ मा दीपावलीको अवसर पारेर सिनेमा हलमा प्रदर्शनमा आएको हो।
फिल्म हेरेपछि दर्शकले यसको कथा, पात्रको प्रस्तुति र विभिन्न दृश्यबारे प्रतिक्रिया दिइरहेका छन्। विशेषगरी १४ हजार राक्षससँग सीताको युद्ध देखाइएको प्रसङ्ग अहिले फिल्मको चर्चित विवादमध्ये एक बनेको छ।