संखुवासभा । श्रम संस्कृति पार्टीका वरिष्ठ नेता सुदन किरातीले नयाँ राजनीतिक शक्तिबाट पनि अपेक्षाअनुसार काम हुन नसकेको भन्दै सरकारको कार्यशैलीप्रति प्रश्न उठाएका छन् । उनले पुराना दलमाथि भ्रष्टाचारको आरोप लाग्ने गरेकोमा नयाँ भनिएका शक्तिबाट देशकै भविष्य जोखिममा पर्ने चिन्ता बढेको टिप्पणी गरे ।
संखुवासभाको चिचिला गाउँपालिकामा आयोजित पार्टीको ‘हातेमालो’ कार्यक्रममा बोल्दै किरातीले भने, ‘पुरानाले घुस खायो भन्थे, नयाँले त देशै खाला भन्ने चिन्ता बढेर गएको छ ।’
सरकारले बहुमत पाएपछि परिवर्तन र चमत्कार गर्ने दाबी गरे पनि व्यवहारमा त्यस्तो नदेखिएको उनको आरोप थियो । चुनावअघि तीनवटा फाइल खोल्नेबित्तिकै सबै जेल जाने र देशको अवस्था सुधारिने बताइए पनि ती फाइल किन नखोलिएको भन्दै उनले प्रश्न गरे ।
‘सत्ताधारी दलका साथीहरू सङ्ख्या पुगेन भन्थे, जनताले पुर्याइदिए । बहुमत पाएको दिन जादु गर्छौं भन्थे, जादु भएको छैन । तीनवटा फाइल खोल्दा सबै जेल जान्छ, देश चकाचक बनाइन्छ भन्थे । तर फाइल किन खोलिएन ? कसले खोल्न दिएन ? कहिलेसम्म खुल्छ ? जनताले कति धैर्य गर्नुपर्ने हो ?’ उनले प्रश्न गरे ।
जनताले ठूलो समर्थन दिँदा पनि सरकारले समयमै सही निर्णय लिन नसके अवस्था नियन्त्रणबाहिर जान सक्ने चेतावनीसमेत किरातीले दिए । ‘भिरमा जाने गाईलाई काँध थाम्न सकिँदैन’ भन्ने आशय व्यक्त गर्दै उनले सरकारलाई समयमै सचेत हुन आग्रह गरे ।
उनका अनुसार जनताको दैनिकी सङ्कटग्रस्त बन्दै गएको, लगानीकर्तामा त्रास बढेको, कर्मचारीतन्त्र अस्तव्यस्त भएको र अन्तर्राष्ट्रिय विश्वास कमजोर हुँदै गएको अवस्था सरकारले गम्भीरतापूर्वक लिनुपर्छ । यसले नेपालको भू–राजनीतिक अवस्था थप जटिल बनाउन सक्ने उनको भनाइ थियो ।
श्रम संस्कृति पार्टीको ‘हातेमालो’ कार्यक्रमअन्तर्गत आयोजित उक्त कार्यक्रममा किरातीले अन्य राजनीतिक दल परित्याग गरी पार्टीमा प्रवेश गरेका दर्जनौँ नेता तथा कार्यकर्तालाई स्वागत गरेका थिए ।