काठमाडौँ। नेपाल इन्जिनियर्स एसोसिएसनले इन्जिनियरहरूको पेसागत सम्मान, सुरक्षा र सहज कार्यवातावरण सुनिश्चित गर्न माग गर्दै प्रधानमन्त्रीको ध्यानाकर्षण गराएको छ।
एसोसिएसनका अध्यक्ष इन्जिनियर सुबास चन्द्र बरालको हस्ताक्षर रहेको ध्यानाकर्षण पत्र शुक्रबार प्रधानमन्त्री तथा मन्त्रिपरिषद्को कार्यालयमा दर्ता गरिएको हो।
जलस्रोत तथा सिँचाइ विभागका महानिर्देशक इन्जिनियर दिनेश रजौरिया र सुनकोशी मरिन डाइभर्सन बहुउद्देश्यीय आयोजनाका निर्देशक इन्जिनियर कृष्णप्रसाद रिजाललाई केही दिनअघि प्रहरीले नियन्त्रणमा लिएपछि एसोसिएसनले यस विषयमा सरकारको ध्यानाकर्षण गराएको हो।
यसअघि कात्तिक १३ गते पनि एसोसिएसनले प्रेस विज्ञप्ति जारी गर्दै उनीहरूलाई नियन्त्रणमा लिनुको कानुनी आधार सार्वजनिक गर्न माग गरेको थियो। तर, घटनाको वास्तविकता र कानुनी आधारबारे स्पष्ट जानकारी सार्वजनिक नभएको भन्दै इन्जिनियर समुदायमा अन्योल र त्रास बढेको एसोसिएसनले जनाएको छ।
एसोसिएसनले कुनै पनि विषयमा अनुसन्धान वा सोधपुछ गर्नुपरे प्रचलित कानुन र स्थापित प्रशासनिक प्रक्रियाअनुसार अघि बढ्नुपर्नेमा जोड दिएको छ। साथै, प्राविधिक नेतृत्वमा रहेका व्यक्तिहरूसँग व्यवहार गर्दा उनीहरूको पद र पेसागत गरिमाको सम्मान हुनुपर्ने धारणा राखेको छ।
पछिल्लो घटनाक्रमले इन्जिनियरिङ क्षेत्रमा आशङ्का र अनिश्चितता बढाएको भन्दै एसोसिएसनले सरकारसमक्ष पाँचबुँदे माग अघि सारेको छ।
एसोसिएसनका प्रमुख मागमा पक्राउको स्पष्ट कानुनी आधार सार्वजनिक गर्नुपर्ने, सोधपुछका क्रममा पेसागत मर्यादा कायम राख्नुपर्ने, इन्जिनियरहरूको मनोबल कमजोर पार्ने नभई उच्च बनाउने वातावरण सिर्जना गर्नुपर्ने तथा सार्वजनिक खरिद प्रक्रियासँग सम्बन्धित विवादलाई सार्वजनिक खरिद ऐन र स्थापित संयन्त्रमार्फत समाधान गर्नुपर्ने विषय समेटिएका छन्।
प्राविधिक जनशक्तिलाई त्रास र दबाबबीच काम गर्नुपर्ने अवस्था सिर्जना भए राष्ट्रिय गौरवका आयोजनासहित मुलुकको समग्र पूर्वाधार विकास प्रभावित हुन सक्ने चेतावनीसमेत एसोसिएसनले दिएको छ।