अभियानले कुकुरप्रतिको माया र सम्मानलाई तिहारको एक दिनमा मात्र सीमित नराखी वर्षभरि निरन्तरता दिनुपर्ने सन्देश दिएको छ। ‘एक दिनको माला होइन, हरेक दिनको माया’ भन्ने नारासहित अभियान अघि बढाइएको गोल्यान फाउन्डेसनकी प्रमुख कार्यकारी अधिकृत (सीईओ) ज्योति गैह्रेले जानकारी दिइन्।
उनका अनुसार सामुदायिक कुकुरप्रति देखाइने सद्भावलाई चाडपर्वको अवसरमा मात्र सीमित नराखी नियमित हेरचाह र संरक्षणको अभ्यास विकास गर्नु अभियानको मुख्य उद्देश्य हो।
यस परियोजनाअन्तर्गत सामुदायिक कुकुरलाई नियमित खाना खुवाउने, आवश्यक खोप लगाउने तथा स्वास्थ्य परीक्षण गराउने कार्यक्रम सञ्चालन गरिनेछ। साथै, स्थानीय समुदायका बासिन्दालाई आफ्नो वरपर रहेका कुकुरको संरक्षण र हेरचाहमा सक्रिय सहभागी गराउने लक्ष्य राखिएको गैह्रेले बताइन्।
अभियान शुभारम्भ कार्यक्रममा प्रतिनिधिसभा सदस्य रञ्जु दर्शनाको प्रमुख आतिथ्यता रहेको थियो। कार्यक्रममा काठमाडौं महानगरपालिकाका जनप्रतिनिधि, विभिन्न समुदायका प्रतिनिधि तथा स्वयंसेवकहरूको पनि सहभागिता थियो।
फाउन्डेसनले यस अभियानमार्फत सामुदायिक कुकुरप्रति जिम्मेवार व्यवहारको विकास गर्दै उनीहरूको स्वास्थ्य, सुरक्षा र कल्याणमा दीर्घकालीन योगदान पुर्याउने अपेक्षा गरेको छ।