काठमाडौं । निवर्तमान प्रहरी महानिरीक्षक दानबहादुर कार्कीले तिहार तथा दीपावलीको अवसरमा शुभकामना सन्देश जारी गर्दै संस्थागत एकता, व्यावसायिक इमानदारी र जनविश्वास बलियो बनाउनुपर्नेमा जोड दिएका छन्।
आइतबार नेपाली नागरिक, नेपाल प्रहरीका कर्मचारी तथा उनीहरूका परिवारजनलाई पर्वको शुभकामना दिँदै कार्कीले तिहारले व्यक्तिगत खुसीसँगै सामाजिक सद्भाव र संस्थागत एकतालाई पनि मजबुत बनाउने विश्वास व्यक्त गरेका छन्।
उनले साझा उद्देश्य प्राप्त गर्न सामूहिक हित, आपसी सद्भाव र संगठनभित्रको एकता आवश्यक रहेको उल्लेख गरेका छन्। भावनात्मक एकता कायम हुन सके मात्रै संस्थागत रूपमा बलियो बन्न सकिने उनको सन्देश छ।
कार्कीले अज्ञानतामाथि ज्ञान, भ्रममाथि तथ्य र असत्यमाथि सत्यको विजय हुने चेतना विकास गर्नुपर्ने बताएका छन्। मनमा रहेका द्वेष, अहंकार, सङ्कीर्णता र नकारात्मक प्रवृत्ति त्यागेर विवेक, सकारात्मक सोच तथा सिर्जनशीलतालाई आत्मसात् गर्न उनले आग्रह गरेका छन्।
सार्वजनिक संस्थाको प्रतिष्ठा र गरिमा कायम राख्दै नागरिकको विश्वास बढाउन तथा राष्ट्रसेवाप्रतिको समर्पणलाई थप बलियो बनाउन तिहारले प्रेरणा दिने उनको अपेक्षा छ।
महालक्ष्मीको आशीर्वादले व्यक्तिगत र पारिवारिक जीवनमा सुख, शान्ति तथा आत्मीयता कायम होस् भन्दै उनले सामाजिक र संस्थागत क्षेत्रमा पनि जिम्मेवारीबोध, व्यावसायिक निष्ठा र संगठनात्मक एकताको भावना बढोस् भन्ने कामना गरेका छन्।
जीवनलाई सात रङले रङ्गीन बनाउने र सात ऊर्जाले सिर्जनशीलता थप्ने विश्वास व्यक्त गर्दै कार्कीले सबैको हृदयमा मानवता, विवेक र सत्कर्मको ज्योति फैलियोस् भन्ने शुभेच्छा व्यक्त गरेका छन्।
यसैबीच, मन्त्रिपरिषद्को बुधबार बसेको बैठकले कार्कीलाई प्रहरी महानिरीक्षक पदबाट हटाएर प्रधानमन्त्रीको सुरक्षा सल्लाहकार नियुक्त गर्ने निर्णय गरेको थियो। सरकारले डा. मनोज केसीलाई नयाँ प्रहरी महानिरीक्षकमा नियुक्त गरिसकेको छ। केसीले पदभारसमेत ग्रहण गरिसकेका छन्।
प्रहरी प्रमुखको जिम्मेवारीबाट हटाइएपछि कार्कीले सरकारको निर्णयविरुद्ध सर्वोच्च अदालतमा रिट दायर गरेका छन्।