काठमाडौं, २७ असोज । एमालेले रास्वपा सांसद खगेन्द्र सुनारमाथि पार्टीले नभई राज्यका निकायले स्वतन्त्र र निष्पक्ष छानबिन गर्नुपर्ने बताएको छ।
पूर्वराज्यमन्त्रीसमेत रहेकी महिला नेतृलाई सुनारले अश्लील गालीगलौज गर्दै ज्यान मार्ने धम्की दिएको अडियो सार्वजनिक भएपछि एमाले प्रचार विभाग प्रमुख निरज आचार्यले राज्यकै निकायले उनीमाथि छानबिन गर्नुपर्ने बताएका छन्।
‘हिजो शोषित, पीडित र दलित समुदायको न्यायका लागि बोल्नेहरू आज सत्ताको आडमा महिलालाई नै डर र धम्की दिने आरोपमा मुछिनु विडम्बनापूर्ण छ,’ उनले भने।
महिलालाई ज्यान मार्ने, रगत पिउने धम्की दिएको भनिएको अडियो सार्वजनिक भएपछि यो विषय अब पार्टीको आन्तरिक छानबिनमा मात्रै सीमित हुन नहुने उनको भनाइ छ।
‘रास्वपाको छानबिन आफ्नो ठाउँमा छ, तर सरकारले र सम्बन्धित राज्यका निकायले पनि निष्पक्ष र स्वतन्त्र अनुसन्धान गर्नुपर्छ। दलितको अधिकारको नारा लगाउनु र महिलाको सम्मानको रक्षा गर्नु फरक कुरा होइनन्, दुवै न्यायका आधार हुन्। महिला होस् वा दलित, कमजोर होस् वा शक्तिशाली, कसैलाई पनि धम्की र अपमान सहन बाध्य पार्न पाइँदैन,’ उनले भने।
नेता आचार्यले सत्ता कसैलाई कानुनभन्दा माथि उठ्ने लाइसेन्स हुन नहुने पनि बताएका छन्। ‘आरोप प्रमाणित भए पद, पार्टी र पहुँच नहेरी कानुनअनुसार कारबाही हुनुपर्छ। आरोपको निष्पक्ष छानबिन हुनुपर्छ र पीडित भनिएकी महिलाको सुरक्षा सुनिश्चित गरिनुपर्छ,’ उनले भने।