२८ असोज, काठमाडौं । उज्यालो नेपाल पार्टीले विद्युत् महसुलमा लगाइएको ५ प्रतिशत मूल्य अभिवृद्धि कर (भ्याट) खारेज गर्न माग गर्दै हस्ताक्षर अभियानलाई पुनः अघि बढाएको छ।
पार्टीले गत भदौ १ गतेदेखि सुरु गरेको अभियान रसुवामा भदौ १० गते आएको विनाशकारी बाढीका कारण स्थगित गरेको थियो।
पार्टीका सचिव केदार खड्काका अनुसार नागरिकको उत्साहजनक सहभागितामा अघि बढिरहेको अभियानलाई निरन्तरता दिने उद्देश्यले पुनः सञ्चालन गर्ने निर्णय गरिएको हो।
अभियानलाई प्रभावकारी रूपमा अघि बढाउन पार्टीले प्रदेश, जिल्ला, पालिका र वडा तहका सम्पूर्ण नेतृत्व, नेता तथा कार्यकर्तालाई आ–आफ्नो क्षेत्रमा तत्काल हस्ताक्षर संकलनको काम सुरु गर्न आह्वान गरेको छ।