सरकारले राष्ट्रिय स्वतन्त्र पार्टीका सांसद खगेन्द्र सुनारमाथि प्रक्रियाअनुसार अनुसन्धान गरेर अघि बढ्ने बताएको छ।
शुक्रबार सिंहदरबारमा बसेको मन्त्रिपरिषद्को बैठकपछि निर्णयहरू सुनाउने क्रममा सूचना तथा सञ्चारमन्त्री डा. विक्रम तिमिल्सिनाले यस्तो बताएका छन्। सांसद सुनारले एक महिलामाथि अश्लील शब्दहरू प्रयोग गरी धम्की दिएको आरोपसहितको अडियो बाहिरिएको थियो। सोही विषयमा सञ्चारकर्मीहरूले सोधेको प्रश्नमा मन्त्री तिमिल्सिनाले सरकारले आवश्यक पर्दा अनुसन्धान गरेर विधिवत् रूपमा हेरी अघि बढ्ने बताएका छन्। उनले सरकारले घटनाबारे आवश्यक चासो नदेखाएको भन्ने कुरामा सत्यता नरहेको भन्दै मन्त्री तिमिल्सिनाले आवश्यक प्रक्रियाअनुसार सरकार अघि बढ्ने बताएका छन्।
उनले भने, ‘सरकारले आवश्यक पर्दाखेरि अनुसन्धान गरेर यसलाई विधिवत् रूपमा कसरी अगाडि बढाउनुपर्छ। तपाईंले कुन प्रमाणको आधारमा, कुन तथ्यको आधारमा, के आधारमा दबाउन खोजिएको भन्नुभयो, सरकारको त्यस्तो कुनै नियत छैन। त्यस्तो हुनु हुँदैन, हुँदैन। आवश्यक सबै प्रक्रिया अगाडि बढ्छ। मन्त्रिपरिषद्मा आज भएका निर्णयहरू मैले सुनाएँ। यो विषयमा मन्त्रिपरिषद्को कुनै निर्णय भएको छैन।’
मन्त्री तिमिल्सिनाले मन्त्रिपरिषद्ले सांसद सुनारको बारेमा पनि कुनै निर्णय नगरेको दाबी गरेका छन्।