काठमाडौं उपत्यकामा ट्राफिक नियम उल्लङ्घन गर्ने ४७० जना सवारी चालकलाई पछिल्लो २४ घण्टामा कारबाही गरिएको छ। ट्राफिक प्रहरीले विभिन्न स्थानमा गरेको सवारी जाँचका क्रममा नियमविपरीत सवारी चलाउने चालकहरू कारबाहीमा परेका हुन्।
आइतबार बिहानसम्म गरिएको जाँचमा मादक पदार्थ सेवन गरेर सवारी चलाउने ९९ जना चालकलाई कारबाही गरिएको छ। त्यस्तै, सीसीटीभी निगरानीका आधारमा ४० जना र रातो बत्ती उल्लङ्घन गर्ने ३७ जना चालक कारबाहीमा परेका छन्।
ट्राफिक प्रहरीका अनुसार तीव्र गतिमा सवारी चलाउने ११५ जना चालकलाई कारबाही गरिएको छ। यसैगरी, हर्न निषेधसम्बन्धी नियम उल्लङ्घन गर्ने ९ जना, लेन क्रस गर्ने २ जना तथा एकतर्फी सडकको नियम पालना नगर्ने ७ जना चालक कारबाहीमा परेका छन्।
अन्य प्रकारका ट्राफिक नियम उल्लङ्घन गरेको आरोपमा थप १६१ जना चालकलाई कारबाही गरिएको प्रहरीले जनाएको छ। उपत्यकाका विभिन्न स्थानमा गरिएको जाँचमार्फत ट्राफिक नियम पालना गराउने तथा सडक सुरक्षालाई व्यवस्थित बनाउने प्रयास गरिएको छ।