फ्रान्समा देशभर भएका विरोध प्रदर्शनका क्रममा करिब एक हजार जना पक्राउ परेका छन्। प्रदर्शनपछि सार्वजनिक गरिएको प्रारम्भिक विवरणअनुसार पक्राउ पर्नेहरूको संख्या अझै बढ्न सक्ने फ्रान्सका गृहमन्त्री लोरेन्ट नुनेजले बताएका छन्। घटनासम्बन्धी अन्तिम तथ्याङ्क संकलन भइरहेको उनले बताएका छन्।
गृहमन्त्री नुनेजका अनुसार प्रदर्शनका क्रममा विभिन्न स्थानमा हुन सक्ने लुटपाटका घटनालाई नियन्त्रण गर्न सुरक्षा निकाय सफल भएका छन्। फ्रान्सका केही सहरमा प्रदर्शनकारी र प्रहरीबीच झडप भएको विवरण सार्वजनिक भए पनि अघिल्लो शनिबारको तुलनामा यसपटकको अवस्था कम तनावपूर्ण रहेको बताइएको छ।
यसअघि गत साता फ्रान्सका विभिन्न स्थानमा सार्वजनिक तथा निजी भवनमा तोडफोड र आगजनीका घटना भएका थिए। त्यस क्रममा करिब एक हजार ५०० पसलमा लुटपाट भएको विवरण सार्वजनिक भएको थियो।
गृहमन्त्री नुनेजले गत साताको अन्त्यतिर भएका प्रदर्शनका क्रममा मात्रै दुई हजार ७०० भन्दा बढी व्यक्ति पक्राउ परेको बताएका थिए। पछिल्लो घटनाक्रमले फ्रान्समा जारी विरोध प्रदर्शनका क्रममा सुरक्षा व्यवस्थापनलाई चुनौती थपिएको देखाएको छ।