प्रधानमन्त्री शाहले एनपीएललाई नेपालको प्रमुख खेलकुद प्रतियोगिताका रूपमा उल्लेख गर्दै नेपाली क्रिकेटसँग सम्बन्धित खेलाडी, आयोजक तथा प्रतियोगितामा सहभागी अन्तर्राष्ट्रिय खेलाडीलाई शुभकामना दिएका छन्। उनले लिगले केही वर्षमै ठूलो खेलकुद उत्सवको रूप लिएको पनि बताएका छन्।
प्रधानमन्त्री शाहले प्रतियोगितामा सहभागी हुन नेपाल आएका अन्तर्राष्ट्रिय खेलाडी र कमेन्टेटरलाई स्वागत गर्दै नेपाली खेलाडी, आयोजक तथा नेपाल क्रिकेट संघ (क्यान) लाई प्रतियोगिताको सफलताका लागि शुभकामना व्यक्त गरेका छन्। साथै, नेपाली क्रिकेटको निरन्तर प्रगतिको कामना गरेका छन्।
एनपीएलको उद्घाटन खेलमा गत संस्करणको विजेता लुम्बिनी लायन्स र उपविजेता सुदूरपश्चिम रोयल्स आमनेसामने हुनेछन्। निर्धारित तालिकाअनुसार यी दुई टोलीबीचको खेल आज अपराह्न ४ः३० बजे सुरु हुनेछ।
प्रतियोगितामा आठ टोलीले सहभागिता जनाउँदै छन्। लुम्बिनी लायन्स र सुदूरपश्चिम रोयल्ससँगै जनकपुर बोल्ट्स, काठमाडौं गोर्खाज, चितवन राइनोज, विराटनगर किङ्स, पोखरा एभेन्जर्स र कर्णाली याक्सले उपाधिका लागि प्रतिस्पर्धा गर्नेछन्।
एनपीएलका खेल हिमालय स्पोर्ट्स र अनलाइनखबर डटकमबाट प्रत्यक्ष प्रसारण गरिनेछ।