असोज २५ देखि कात्तिक ८ गतेसम्मको तथ्याङ्कअनुसार यस वर्ष पर्यटकको संख्या गत वर्षको सोही अवधिको तुलनामा २ हजार ६२७ ले बढी हो। गत वर्ष दशैं अवधिमा उक्त पदमार्गमा २ हजार ७५७ विदेशी पर्यटक आएका थिए।
अन्नपूर्ण संरक्षण क्षेत्र आयोजना (एक्याप) अन्तर्गत धारापानीस्थित पर्यटक जाँच तथा सूचना केन्द्रका प्रमुख भूपेन्द्र गुरुङका अनुसार पर्यटक आगमन बढ्नुका विभिन्न कारण छन्। मनास्लु क्षेत्रको पदमार्गमा बाढीपहिरोले क्षति पुर्याएपछि आवागमन प्रभावित हुँदा त्यहाँ जाने केही पर्यटक अन्नपूर्ण पदमार्गतर्फ आकर्षित भएको उनले बताए।
यसका साथै, अनुकूल मौसम र पछिल्लो समय मानिसमा घुमफिर गर्ने प्रवृत्ति बढ्दै जानुले पनि पर्यटकको संख्या वृद्धि भएको गुरुङको भनाइ छ।
पर्यटक जाँच तथा सूचना केन्द्रको तथ्याङ्कअनुसार दशैं अवधिमा अन्नपूर्ण पदमार्गमा आउनेमध्ये ३ हजार २८८ पुरुष, २ हजार ९४ महिला र अन्य समूहका दुई जना छन्। राष्ट्रियताका आधारमा सार्क राष्ट्रबाट ६०९ र गैरसार्क राष्ट्रबाट ४ हजार ७७५ पर्यटक आएका छन्।
देशगत विवरणमा भारतबाट सबैभन्दा धेरै ६०६ पर्यटक आएका छन्। त्यस्तै, जर्मनीबाट ४३८, इजरायलबाट ४१८, फ्रान्सबाट ३६४ र संयुक्त राज्य अमेरिकाबाट ३५२ पर्यटकले पदयात्रा गरेका छन्।
लमजुङको बेँसीसहरबाट सुरु हुने अन्नपूर्ण चक्रीय पदमार्ग मनाङ हुँदै थोराङ्ला भञ्ज्याङ पार गरेर मुस्ताङसम्म पुग्छ। हिमाली दृश्य, प्राकृतिक सुन्दरता, परम्परागत बस्ती र स्थानीय संस्कृतिको अनुभव लिन सकिने भएकाले यो पदमार्ग विदेशी पर्यटकका लागि आकर्षक गन्तव्य मानिन्छ।