बैठकमा सहभागी हुन भारतीय सशस्त्र सीमा बल (एसएसबी) का महानिर्देशक सञ्जय सिंघल आफ्नो प्रतिनिधिमण्डलको नेतृत्व गर्दै काठमाडौँ आएका छन्। नेपाली पक्षको नेतृत्व सशस्त्र प्रहरी महानिरीक्षक नारायणदत्त पौडेलले गरेका छन्।
सीमा क्षेत्रमा हुने आपराधिक गतिविधि नियन्त्रण गर्नुका साथै दुवै देशका सीमावर्ती सुरक्षा निकायबीच समन्वय र सहकार्यलाई थप प्रभावकारी बनाउने उद्देश्यले बैठक आयोजना गरिएको हो।
बैठकमा नेपालका तर्फबाट गृह मन्त्रालय, परराष्ट्र मन्त्रालय, नेपाल प्रहरी, सशस्त्र प्रहरी बल नेपाल, राष्ट्रिय अनुसन्धान विभाग र नापी विभागका प्रतिनिधिहरू सहभागी छन्। भारतीय पक्षबाट गृह मन्त्रालय, विदेश मन्त्रालय, नेपालस्थित भारतीय राजदूतावास तथा सशस्त्र सीमा बलका उच्च अधिकारीहरूको सहभागिता रहेको छ।
सशस्त्र प्रहरी बलका प्रवक्ता डीआईजी नेत्रबहादुर कार्कीका अनुसार बैठकमा सीमा सुरक्षाको अवस्था, अवैध गतिविधि नियन्त्रण, मानव तस्करी, लागूऔषध ओसारपसार र अवैध हातहतियार नियन्त्रणका लागि दुवै देशले गरेका प्रयासको समीक्षा गरिनेछ।
त्यसैगरी, सीमा व्यवस्थापनसम्बन्धी संयन्त्रको मार्गदर्शनअनुसार दशगजामा भएका अतिक्रमण हटाउने, सीमा स्तम्भको संरक्षण, मर्मतसम्भार तथा निर्माण र सीमावर्ती क्षेत्रमा हुने आपराधिक गतिविधि नियन्त्रणका विषयमा पनि छलफल हुनेछ।
सीमावर्ती क्षेत्रमा बसोबास गर्ने नागरिकसँगको सम्बन्ध सुदृढ बनाउने तथा नेपाल र भारतका सीमा सुरक्षा बलबीच आपसी विश्वास, समन्वय र सहकार्य विस्तार गर्ने विषयलाई पनि बैठकमा प्राथमिकता दिइनेछ।
सशस्त्र प्रहरी प्रधान कार्यालयका अनुसार नेपाल–भारत खुला सिमानाको दुरुपयोग गर्दै तेस्रो मुलुकका नागरिकले गर्न सक्ने अवैध आवागमनलाई प्रभावकारी रूपमा नियमन गर्ने विषयमा समेत छलफल हुनेछ। साथै, सीमा व्यवस्थापनलाई थप व्यवस्थित, प्रभावकारी र आधुनिक बनाउन उपयुक्त प्रविधिको प्रयोग गर्ने सम्भावनाबारे पनि दुवै पक्षले विचारविमर्श गर्नेछन्।