काठमाडौं । बङ्गालको खाडीमा विकसित चक्रवात ‘अर्नब’ कमजोर बनेपछि नेपालमा तीव्र हावाहुरी चल्ने सम्भावना नरहेको मौसम पूर्वानुमान महाशाखाले जनाएको छ। चक्रवातको प्रभावले केही स्थानमा वर्षा हुन सक्ने भए पनि शक्तिशाली हावाहुरीको जोखिम नरहेको महाशाखाको आकलन छ।
मौसमविद्का अनुसार चक्रवात कमजोर हुँदै अहिले शक्तिशाली न्यून चापीय क्षेत्रका रूपमा परिणत भएको छ। वरिष्ठ मौसमविद् विभूति पोखरेलले यसको प्रभावस्वरूप नेपालका विभिन्न क्षेत्रमा हल्कादेखि मध्यम वर्षा हुन सक्ने बताइन्।
उनका अनुसार अन्य क्षेत्रको तुलनामा पूर्वी नेपालमा केही भारी वर्षा हुने सम्भावना छ। चक्रवातको प्रभाव बिहीबार र शुक्रबारदेखि सुरु भएर शनिबारसम्म रहन सक्ने अनुमान गरिएको छ।
बिहीबार साँझदेखि उच्च पहाडी तथा हिमाली भेगमा हिमपात सुरु हुन सक्ने भएकाले ती क्षेत्रका बासिन्दा र यात्रुले विशेष सावधानी अपनाउनुपर्ने पोखरेलले बताइन्। हिमपातका कारण चिसो बढ्नुका साथै पहाडी सडकमा यात्रा प्रभावित हुन सक्ने सम्भावना पनि छ।
विशेषगरी पहिरोको जोखिम रहेका क्षेत्र, जोखिमपूर्ण भौगोलिक अवस्था भएका स्थान तथा कच्ची सडकमा यात्रा गर्दा मौसमको अवस्था बुझेर मात्र अघि बढ्न मौसमविद्ले सुझाव दिएका छन्। सामान्य अवस्थामा रहेका प्रमुख राजमार्गमा भने तत्काल ठूलो जोखिमको अवस्था नरहेको उनको भनाइ छ।
मौसमको अवस्था परिवर्तन हुन सक्ने भएकाले यात्रा गर्नुअघि पछिल्लो मौसम पूर्वानुमान र सम्बन्धित निकायका सूचनामा ध्यान दिन आवश्यक रहेको छ।