काठमाडौँ । नेपाली कांग्रेसका सभापति गगन थापाले पार्टीको १५औँ महाधिवेशनबाट पारित नीति तथा कार्यक्रम जनतामाझ पुर्याउन मंसिर महिनाभरि ‘कांग्रेस तयार छ’ विशेष अभियान सञ्चालन गर्ने घोषणा गरेका छन्।
नवनिर्वाचित पदाधिकारी तथा केन्द्रीय सदस्यहरूको शपथ ग्रहणपछि सम्बोधन गर्दै थापाले पार्टीको आगामी चार वर्षको कार्ययोजना तयार गरी निश्चित कार्यतालिकाअनुसार संगठन सञ्चालन गरिने बताए।
उनका अनुसार महाधिवेशनबाट पारित नीति, संगठन सुधारका प्रस्ताव र कार्यक्रमलाई समेटेर एकीकृत कार्ययोजना बनाइनेछ। पार्टी केन्द्रीय कार्यालयले तयार गर्ने उक्त कार्ययोजना आगामी बैठकमा प्रस्तुत गरिने उनले जानकारी दिए।
सभापति थापाले महाधिवेशनबाट पारित नीति तथा कार्यक्रम पार्टीका नेता–कार्यकर्ता मात्र नभई आम नागरिकसम्म पुर्याउनुपर्नेमा जोड दिए। वडा तहका सदस्यदेखि पार्टीका समर्थक र सर्वसाधारणलाई समेत कांग्रेसले लिएका नीति तथा कार्यक्रमबारे जानकारी गराउने उद्देश्यले अभियान सञ्चालन गर्न लागिएको उनको भनाइ छ।
‘कांग्रेस तयार छ’ अभियानमार्फत महाधिवेशनका निर्णयलाई व्यवस्थित रूपमा अभिलेखीकरण गर्नुका साथै मुलुकका विद्यमान समस्या समाधान र नागरिकका आकाङ्क्षा सम्बोधन गर्न पार्टी तयार रहेको सन्देश प्रवाह गरिने उनले बताए।
थापाले पार्टी अब आत्मसमीक्षा र आत्मालोचनामा मात्र सीमित नरही जिम्मेवारी निर्वाह गर्दै अघि बढ्नुपर्ने धारणा राखे। प्रतिपक्ष, स्थानीय सरकार र राष्ट्रिय राजनीतिक शक्तिका रूपमा कांग्रेसले खेल्नुपर्ने भूमिका प्रभावकारी बनाउनुपर्ने उनको भनाइ थियो।
‘अब समीक्षा र आत्मालोचनाको चरण सकियो, अब अगाडि बढ्ने हो,’ उनले भने, ‘कांग्रेसले अब जिम्मेवारी वहन गर्दै अघि बढ्नुपर्नेछ। प्रतिपक्ष, स्थानीय सरकार र राष्ट्रिय शक्तिका रूपमा पार्टीले निर्वाह गर्नुपर्ने भूमिका पूरा गर्न तयार छ।’
मंसिरमा सञ्चालन हुने अभियानको विस्तृत कार्ययोजना पार्टी कार्यालयले तयार गर्नेछ। अभियानको सैद्धान्तिक पक्ष केन्द्रीय कार्यसमितिको बैठकबाट पारित भएपछि अन्य तयारी अघि बढाइने सभापति थापाले जानकारी दिए।
अभियानमार्फत महाधिवेशनबाट आएको नयाँ नेतृत्वले पार्टीको नीति, संगठन र कार्यशैलीमा गर्न चाहेको परिवर्तनबारे नागरिकलाई जानकारी गराउने कांग्रेसको तयारी छ।