काठमाडौं । नेपाली सेनाको आगामी नेतृत्वका लागि सम्भावित अधिकारीका रूपमा हेरिएका उपरथी अनुपजंग थापा रथी पदमा बढुवाका लागि सिफारिस भएका छन्। बढुवा प्रक्रिया पूरा भएपछि उनी प्रधान सेनापति अशोक सिग्देलपछिको नेतृत्व क्रमको प्रमुख दाबेदारमध्ये रहनेछन्।
रथी प्रदीपजंग केसीको अध्यक्षतामा बसेको बढुवा सिफारिस बोर्डले थापाको नाम एकल रूपमा सिफारिस गरेको हो। केसी स्वयं आगामी मंसिर १५ गते अनिवार्य अवकाशमा जाने तयारीमा छन्। उनको अवकाशपछि रिक्त हुने पदमा मधुकर कार्कीको नाम सिफारिस हुन सक्ने सम्भावना रहेको छ।
बढुवा सिफारिसप्रति असहमति भए उजुरी दिन सकिने व्यवस्था गर्दै बोर्डले सात दिनको समयसीमा तोकेको छ। यससम्बन्धी सूचना सोमबार सार्वजनिक गरिएको हो।
रथी गणेश श्रेष्ठले आगामी मंसिर ७ गते अवकाश पाएपछि रिक्त हुने पदमा अनुपजंग थापालाई बढुवाका लागि सिफारिस गरिएको हो।