काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले ९५औँ पटक रक्तदान गरेका छन्। अस्पतालहरूमा रगतको अभाव हुन थालेको खबर सार्वजनिक भएपछि राप्रपाले बिहीबार पार्टीको केन्द्रीय कार्यालयमा रक्तदान कार्यक्रम आयोजना गरेको हो।
कार्यक्रममा अध्यक्ष लिङ्देन स्वयं सहभागी भएर रक्तदान गरेका थिए। अस्पतालमा रगत अभाव भइरहेको समाचार सुनेपछि तत्काल रक्तदान कार्यक्रम सञ्चालन गर्ने निर्णय गरेको उनले बताए।
बिहीबार पार्टी कार्यालय आउँदै गर्दा गाडीमा समाचार सुनेको उल्लेख गर्दै लिङ्देनले कार्यालय पुगेपछि नै रक्तदान कार्यक्रम आयोजना गर्ने तयारी गरेको जानकारी दिए। सोहीअनुसार कार्यक्रम आयोजना गरिएको र आफूले ९५औँ पटक रक्तदान गर्ने अवसर पाएको उनको भनाइ थियो।
उनले रक्तदानलाई कुनै औपचारिक कार्यक्रम वा एकदिने अभियानमा मात्र सीमित नराखी जीवनभर अपनाउनुपर्ने मानवीय तथा सामाजिक जिम्मेवारीका रूपमा लिनुपर्नेमा जोड दिए।
मानवीय दायित्व पूरा गर्न पार्टीका सबै तहका नेता तथा कार्यकर्तालाई रक्तदान अभियानमा सक्रिय सहभागी हुन पनि उनले आग्रह गरे।
रक्तदान कार्यक्रममा राप्रपा सांसद खुस्बु ओली, युवा मोर्चाका अध्यक्ष कैलाश कटुवाललगायत पार्टीका दर्जनौँ युवा नेता तथा कार्यकर्ताले समेत रक्तदान गरेका थिए।