काठमाडौं महानगरपालिकाकी कार्यवाहक प्रमुख सुनिता डंगोलले अग्ला भवन र चिल्ला सडकले मात्र कुनै पनि शहर समृद्ध बन्न नसक्ने बताएकी छन् ।
कला, संस्कृति, भाषा, साहित्य र सिर्जनात्मक गतिविधिले मात्रै शहरलाई जीवन्त बनाउने उनको भनाइ छ । महानगरपालिकाको आफ्नै आयोजनामा पहिलोपटक शुरु भएको ‘काठमाडौं फिल्म फेस्टिभल २०२६’ को उद्घाटन गर्दै उनले काठमाडौं परापूर्वकालदेखि नै कथाहरूमा बाँचेको सांस्कृतिक शहर भएको उल्लेख गरिन् ।
काठमाडौं महानगरपालिका युनेस्कोको ‘क्रिएटिभ सिटी अफ फिल्म’ सञ्जालमा सूचीकृत भएपछि पहिलोपटक आफ्नै प्रत्यक्ष आयोजनामा अन्तर्राष्ट्रिय स्तरको फिल्म फेस्टिभल आयोजना गरेको हो । ऐतिहासिक वसन्तपुर क्षेत्रमा आयोजित हेरिटेज वाक, परम्परागत बाजागाजा र सांस्कृतिक प्रदर्शनीसँगै महोत्सवको औपचारिक शुरुवात गरिएको थियो ।
उद्घाटन समारोहलाई सम्बोधन गर्दै कार्यवाहक प्रमुख डंगोलले परम्परागत डबली नाच, द्यः प्याखँ, कात्तिक नाच र नवदुर्गा नाचमार्फत शताब्दीऔँदेखि यहाँका समुदायले आफ्ना कथा प्रस्तुत गर्दै आएको स्मरण गराइन् । आधुनिक युगमा ती ऐतिहासिक कथा र भावनालाई चलचित्रका माध्यमबाट विश्वसामु प्रस्तुत गर्न महानगरले महोत्सव आयोजना गरेको उनले बताइन् ।
चलचित्रले समाजलाई एकै ठाउँमा जोड्ने र मानिसको चेतनामा गहिरो प्रभाव पार्ने अतुलनीय शक्ति राख्ने चर्चा गर्दै उनले सिनेमा समाज जोड्ने बलियो माध्यम भएको तर्क गरिन् ।
काठमाडौं महानगरपालिकाले यसअघि विभिन्न चलचित्र महोत्सवलाई सहयोग गर्दै आए पनि आफ्नै मौलिक पहिचान झल्काउने, आत्मनिर्भर र दिगो अन्तर्राष्ट्रिय चलचित्र महोत्सव निर्माण गर्ने उद्देश्यले यो कदम चालिएको डंगोलले स्पष्ट पारिन् । विश्वभरका प्रतिष्ठित शहरहरूसँगको सांस्कृतिक साझेदारीलाई उपयोग गर्दै महोत्सवलाई अन्तर्राष्ट्रिय ब्रान्डका रूपमा स्थापित गर्ने लक्ष्य रहेको उनको भनाइ छ ।
उनले शहरको समृद्धि अग्ला भवन र चिल्ला सडकले मात्र नभई कला, संस्कृति, भाषा, साहित्य र सिर्जनशीलताबाट मापन हुने बताइन् । महोत्सवलाई सबैको साझा उत्सवका रूपमा विकास गर्दै नेपाली चलचित्र र संस्कृतिलाई विश्वसामु चिनाउन एकजुट हुनुपर्नेमा उनले जोड दिइन् ।
कवि भूपी शेरचनको प्रसिद्ध कविता ‘साँघुरो गल्लीमा मेरो चोक छ, यहाँ के छैन ? सबथोक छ’ स्मरण गर्दै डंगोलले काठमाडौंका साँघुरा गल्ली, चोक र ननीहरूमा अथाह कला, संस्कृति, सपना र सकारात्मक सम्भावना रहेको उल्लेख गरिन् । साथै, महोत्सव सफल बनाउन सम्पूर्ण नागरिक, स्रष्टा र चलचित्रकर्मीलाई उनले आह्वान गरिन् ।