काठमाडौं । राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनका लागि उम्मेदवार छनोट प्रक्रिया अघि बढाएको छ। यसका लागि पार्टीले विभिन्न जिम्मेवारी तोक्दै सातवटा उपसमिति गठन गरेको छ।
पार्टीको केन्द्रीय कार्यालय वनस्थलीमा महामन्त्री विपिनकुमार आचार्यको संयोजकत्वमा बसेको स्थानीय तह निर्वाचन उम्मेदवार छनोट रूपरेखा कार्यान्वयन तथा समन्वय समितिको बैठकले यस्तो निर्णय गरेको हो।
उम्मेदवार छनोट प्रक्रियालाई व्यवस्थित, पारदर्शी र प्रभावकारी बनाउन गठन गरिएका उपसमितिको संयोजकमा क्यान्डिडेट क्लबतर्फ कविन्द्र बुर्लाकोटी, प्रविधितर्फ सुशान्त वैदिक, गुनासो समन्वयतर्फ जनकसिंह धामी र समावेशिता तथा महिला सहभागितातर्फ डा. तोशिमा कार्की रहेका छन्।
त्यस्तै, क्षमता विकास समन्वयको जिम्मेवारी टासी ल्हाजोम, व्यवस्थापनको जिम्मेवारी रहबर अन्सारी र प्रचारप्रसारको जिम्मेवारी मिलन लिम्बूलाई दिइएको छ।
बैठकले महानगरपालिका तथा उपमहानगरपालिकाका वडाध्यक्ष र वडा सदस्य पदमा पार्टीबाट उम्मेदवार बन्न चाहने इच्छुक तथा योग्य व्यक्तिका लागि आवेदनसमेत खुला गरेको छ।
इच्छुक व्यक्तिहरूले पार्टीको क्यान्डिडेट क्लबमार्फत उम्मेदवारीका लागि आवेदन दिन सक्नेछन्। पार्टीले छनोट प्रक्रियामा योग्यता, समावेशिता र पारदर्शितालाई आधार बनाउँदै आवश्यक तयारी अघि बढाएको जनाएको छ।