काठमाडौं । जनता समाजवादी पार्टी (जसपा), नेपालका सांसद महन्थ ठाकुरले भोटेकोशी नदीमा आएको बाढीबाट भएको जनधनको क्षतिप्रति गहिरो दुःख व्यक्त गरेका छन् ।
मंगलबार राष्ट्रिय सभा बैठकमा विशेष समय लिएर बोल्दै सांसद ठाकुरले बाढीमा परी ज्यान गुमाएकाहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरे ।
ठाकुरले बाढीलाई ठूलो प्राकृतिक विपत्तिको संज्ञा दिँदै यसले देशलाई एकताको सूत्रमा बाँध्न मद्दत पुर्याएको बताए । बाढीका कारण कैयौँ नागरिक बेपत्ता हुनुका साथै सीमापारिसमेत शव भेटिएको घटनाले सबैलाई स्तब्ध बनाएको उनको भनाइ छ ।
सम्बोधनका क्रममा उनले विपत्तिको यस घडीमा छिमेकी राष्ट्रहरूबाट प्राप्त सहयोगको चर्चा गर्दै संकट समाधानका लागि नेपालीहरू आफ्नै सामर्थ्यमा सक्षम र तत्पर रहेको बताए ।
मातृभूमिमा आइपरेको दुःखद् समयमा स्वदेश तथा विदेशमा रहेका नेपाली र युवाहरू एकजुट भएकोमा उनले खुसी व्यक्त गरे ।
ठाकुरले भने, ‘यस विपत्तिले हामीलाई आफ्नो सामर्थ्य पहिचान गराएको छ । विपत्तिमा परेका सबैका तर्फबाट र सदनका तर्फबाट म मृतकहरूप्रति श्रद्धाञ्जली र परिवारजनमा हार्दिक समवेदना व्यक्त गर्दछु ।’
उनले विपद्को यस घडीमा सबै पक्ष एकजुट भएर खोज, उद्धार, राहत तथा पुनर्स्थापनाको काममा अघि बढ्नसमेत आग्रह गरे ।
– न्युज एजेन्सी नेपाल