कार्यालयका अनुसार उक्त अवधिमा सबैभन्दा बढी जीप, कार तथा भ्यानमाथि कारबाही गरिएको छ।
जिल्ला ट्राफिक प्रहरी कार्यालयका प्रमुख प्रहरी नायब निरीक्षक नरेन्द्रबहादुर शाहीका अनुसार तीन महिनामा ९१७ वटा जीप, कार तथा भ्यान कारबाहीमा परेका छन्। ती सवारीसाधनबाट मात्रै नौ लाख ६८ हजार रुपैयाँ राजस्व संकलन भएको छ।
त्यसैगरी, नियम उल्लङ्घन गर्ने ९०९ वटा मोटरसाइकल तथा स्कुटरबाट आठ लाख ४९ हजार पाँच सय रुपैयाँ राजस्व उठेको छ।
यस अवधिमा ३८२ वटा बस कारबाहीमा पर्दा तीन लाख १३ हजार पाँच सय रुपैयाँ, ३३५ वटा ट्रकबाट दुई लाख ९५ हजार रुपैयाँ र २५८ वटा अन्य सवारीसाधनबाट दुई लाख छ हजार रुपैयाँ संकलन भएको छ।
त्यस्तै, २१७ वटा ट्र्याक्टरमाथि गरिएको कारबाहीबाट एक लाख ७२ हजार रुपैयाँ राजस्व प्राप्त भएको कार्यालयले जनाएको छ।
प्रहरी नायब निरीक्षक शाहीका अनुसार ट्राफिक नियम उल्लङ्घन गर्नेलाई कारबाही गर्नुका साथै सम्भावित सडक दुर्घटना न्यूनीकरणका लागि जनचेतनामूलक कार्यक्रम पनि सञ्चालन भइरहेको छ।
उनले सवारी दुर्घटनाको जोखिम कम गर्न चालकले गति नियन्त्रण, हेल्मेट तथा सिटबेल्टको अनिवार्य प्रयोग र सडक अनुशासनमा ध्यान दिनुपर्ने बताए। सवारीसाधनको नियमित जाँच तथा ट्राफिक नियम उल्लङ्घन गर्नेमाथिको कारबाहीलाई थप निरन्तरता दिइने उनको भनाइ छ।
तीन महिनामा १८ दुर्घटना, ६ जनाको मृत्यु
यसैबीच, स्याङ्जामा चालु आर्थिक वर्षको पहिलो तीन महिनामा १८ वटा सवारी दुर्घटना भएका छन्।
जिल्ला ट्राफिक प्रहरी कार्यालयका अनुसार ती दुर्घटनामा परी ६ जनाले ज्यान गुमाएका छन्। दुर्घटनामा आठ जना गम्भीर घाइते भएका छन् भने २१ जना सामान्य घाइते भएका छन्।
ट्राफिक प्रहरी प्रमुख शाहीले सडक दुर्घटनाबाट हुने मानवीय क्षति न्यूनीकरण गर्न चालकसँगै यात्रु र अन्य सडक प्रयोगकर्ता पनि जिम्मेवार हुनुपर्ने बताए।
उनले सुरक्षित यात्राका लागि सबैले ट्राफिक नियमको पालना गर्नुपर्नेमा जोड दिएका छन्।