सार्वजनिक भएको सीसीटीभी दृश्यमा हेल्मेट लगाएका र पछाडि झोला भिरेका एक व्यक्ति हातमा फलामको रड बोकेर सडकमा हिँडिरहेको देखिन्छन्। केही अगाडि कालो र खैरो रङको एउटा सडक कुकुर आराम गरिरहेको हुन्छ।
ती व्यक्ति कुकुरको पछाडि पुगेर अचानक रडले प्रहार गर्छन्। प्रहारपछि कुकुर छटपटाउँदै भुइँमा लडेको देखिन्छ। त्यसपछि पनि ती व्यक्तिले रडले कुकुरलाई घोचिरहेको दृश्य फुटेजमा देख्न सकिन्छ।
घटना काठमाडौंको सातुंगलस्थित सशस्त्र प्रहरी बल (एपीएफ) अस्पतालनजिकै भएको बताइएको छ। सडकमा शान्तसँग सुस्ताइरहेको कुकुरमाथि भएको यस्तो आक्रमणले पशु अधिकार र संरक्षणको विषयलाई पुनः चर्चामा ल्याएको छ।
आक्रमण गर्ने व्यक्तिको पहिचान गर्न खोजी
कुकुरमाथि आक्रमण गर्ने व्यक्ति को हुन् र उनले यस्तो हिंसात्मक व्यवहार किन गरे भन्नेबारे अहिलेसम्म स्पष्ट जानकारी सार्वजनिक भएको छैन।
पशु अधिकारकर्मीहरूले सीसीटीभी फुटेजका आधारमा ती व्यक्तिको पहिचान गर्ने प्रयास भइरहेको जनाएका छन्। साथै, घटनामा संलग्न व्यक्तिलाई कानुनी दायरामा ल्याउन सम्बन्धित निकायसँग पहल गर्ने तयारी भइरहेको उनीहरूको भनाइ छ।
पशु संरक्षणको क्षेत्रमा काम गर्दै आएको संस्था टीएफसी नेपालले पनि घटनामा संलग्न व्यक्तिको पहिचान गर्न सर्वसाधारणसँग सहयोग मागेको छ।
संस्थाले पशुमाथि हुने हिंसा र क्रूर व्यवहार गम्भीर चिन्ताको विषय भएको उल्लेख गर्दै यस्ता घटना देखेमा सम्बन्धित निकायलाई तत्काल जानकारी गराउन आग्रह गरेको छ।
टीएफसी नेपालले असहाय तथा बोल्न नसक्ने पशुको संरक्षणका लागि सबैले आवाज उठाउनुपर्नेमा जोड दिएको छ।
पशु संरक्षण र सुरक्षामाथि उठ्यो प्रश्न
पछिल्लो समय विभिन्न स्थानमा पशुप्राणीमाथि हुने हिंसात्मक घटनाहरू सार्वजनिक भइरहेका छन्। सातुंगलको पछिल्लो घटनाले सडकमा आश्रित पशुको सुरक्षा तथा पशुमाथि हुने दुर्व्यवहार नियन्त्रणका लागि प्रभावकारी कदम चाल्नुपर्ने आवश्यकतालाई फेरि उजागर गरेको छ।
सार्वजनिक भएको फुटेजका आधारमा घटनाको निष्पक्ष छानबिन गरी संलग्न व्यक्तिको पहिचान र आवश्यक कानुनी कारबाही गर्नुपर्ने माग उठेको छ।