काठमाडौं । पूर्वप्रधानमन्त्री डा. बाबुराम भट्टराईले मुलुकको पछिल्लो राजनीतिक, आर्थिक तथा प्रशासनिक अवस्थाले गम्भीर सङ्कटको जोखिम बढाएको बताएका छन्। उनले भूराजनीतिक दबाब, राजनीतिक दलभित्रको विवाद र राज्य सञ्चालनका निकायमा देखिएका समस्याप्रति चिन्ता व्यक्त गरेका छन्।
आइतबार सामाजिक सञ्जाल फेसबुकमा आफ्नो धारणा सार्वजनिक गर्दै भट्टराईले सत्तापक्ष र प्रतिपक्ष दुवैतर्फ आन्तरिक विवाद बढिरहेको उल्लेख गरेका छन्। न्यायालय, प्रशासन र प्रहरीजस्ता राज्यका महत्त्वपूर्ण निकायमा देखिएको अव्यवस्था तथा अर्थतन्त्रमा आएको निरन्तर गिरावटले मुलुकको अवस्था चुनौतीपूर्ण बन्दै गएको उनको भनाइ छ।
उनले प्राकृतिक विपत्तिको बढ्दो प्रभाव, युवाहरूको विदेश पलायन र सञ्चार क्षेत्र तथा नागरिक तहमा फैलिएको निराशालाई पनि देशको वर्तमान अवस्थाका चिन्ताजनक पक्षका रूपमा औँल्याएका छन्।
भट्टराईले मुलुकले थप राजनीतिक अस्थिरता र उथलपुथल थेग्न सक्ने अवस्था नरहेको धारणा राख्दै सबै पक्षलाई जिम्मेवार बन्न आग्रह गरेका छन्।
आफ्नो सन्देशमार्फत उनले सबैलाई आ–आफ्नो क्षेत्रबाट सकारात्मक योगदान गर्न र नकारात्मक गतिविधिबाट टाढा रहन अपिल गरेका छन्।