काठमाडौं । सरकारले चालु आर्थिक वर्ष २०८३/८४ को पहिलो तीन महिनामा १३५ परिवारलाई जग्गाधनी प्रमाणपुर्जा (लालपुर्जा) वितरण गरेको छ।
भूमि समस्या समाधान समिति (ताहाचल) ले साउनदेखि असोज मसान्तसम्मको अवधिमा उक्त सङ्ख्यामा लालपुर्जा वितरण गरेको भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयको पहिलो त्रैमासिक प्रगति विवरणमा उल्लेख छ।
प्रतिवेदनअनुसार वितरण गरिएका कुल १३५ लालपुर्जामध्ये ११ वटा भूमिहीन दलित, ४१ वटा भूमिहीन सुकुम्बासी र ८३ वटा अव्यवस्थित बसोबासी परिवारलाई प्रदान गरिएको हो।
भूमिहीन तथा अव्यवस्थित बसोबासीको समस्या समाधानका लागि समितिले लगत सङ्कलन, विवरण प्रमाणीकरण र जग्गाको नापजाँच तथा नक्साङ्कनको काम अघि बढाएको जनाएको छ। यस अवधिमा समितिको सूचना प्रणालीमा कुल ५१ हजार ५१७ वटा निवेदन दर्ता भएका छन्।
दर्ता भएका निवेदनमध्ये भूमिहीन दलितका ७ हजार ७०, भूमिहीन सुकुम्बासीका ८ हजार ८३ र अव्यवस्थित बसोबासीका ३१ हजार ३१७ वटा रहेका छन्। यसैगरी, विगतका आयोगबाट अधुरा रहेका काम पूरा गर्न ५ हजार १२७ वटा निवेदन परेको प्रतिवेदनमा उल्लेख छ।
जग्गाको पहिचान तथा वितरण प्रक्रियालाई अघि बढाउने क्रममा समितिले तीन महिनाभित्र देशका विभिन्न स्थानमा १ हजार ९४७ कित्ता जग्गाको नापजाँच तथा नक्साङ्कन सम्पन्न गरेको छ।
काठमाडौं उपत्यकामा भूमिसम्बन्धी समस्या समाधानका लागि समितिले भक्तपुर नगरपालिकासँग पनि समझदारी गरेको छ। समझदारीअनुसार भूमिहीन दलित तथा सुकुम्बासीलाई जग्गा वितरण र अव्यवस्थित बसोबासीको व्यवस्थापनका लागि सहकार्य गरिनेछ। सहमतिपछि वास्तविक विवरण सङ्कलन गर्न औपचारिक सूचना पनि जारी भइसकेको मन्त्रालयको प्रतिवेदनमा जनाइएको छ।