आयातमा विद्युतीय कार र सवारीसाधनको योगदान, निर्यातमा प्रशोधित भटमासको तेल लगातार तीन महिना शीर्ष स्थानमा
बुटवल । भैरहवा भन्सार कार्यालयले चालु आर्थिक वर्ष २०८३/०८४ को पहिलो तीन महिनामा निर्धारित लक्ष्यभन्दा बढी राजस्व सङ्कलन गरेको छ । साउनदेखि असोज मसान्तसम्मका लागि २९ अर्ब २८ करोड रुपैयाँ राजस्व उठाउने लक्ष्य राखिएकामा कार्यालयले ३३ अर्ब ३४ करोड २० लाख रुपैयाँभन्दा बढी सङ्कलन गरेको हो । यो निर्धारित लक्ष्यको करिब ११४ प्रतिशत हो ।
कार्यालयको मासिक विवरणअनुसार साउनमा ८ अर्ब ५४ करोड रुपैयाँ राजस्व सङ्कलन गर्ने लक्ष्य रहेकामा ८ अर्ब ८३ करोड २६ लाख रुपैयाँ उठेको छ । यसले मासिक लक्ष्यको १०३ प्रतिशत उपलब्धि हासिल गरेको देखाउँछ ।
त्यस्तै, भदौमा ९ अर्ब ७६ करोड रुपैयाँ लक्ष्य राखिएकामा १० अर्ब ६३ करोड १६ लाख रुपैयाँ सङ्कलन भएको छ । उक्त रकम लक्ष्यको करिब १०९ प्रतिशत हो ।
असोजमा भने राजस्व सङ्कलन थप बढेको छ । सो महिनाका लागि १० अर्ब ९८ करोड रुपैयाँ उठाउने लक्ष्य निर्धारण गरिएकोमा १३ अर्ब ८८ करोड १ लाख रुपैयाँ सङ्कलन भएको कार्यालयको तथ्याङ्क छ । यो मासिक लक्ष्यको करिब १२६ प्रतिशत हो ।
गत आर्थिक वर्षको पहिलो तीन महिनामा कार्यालयले २७ अर्ब ७५ करोड ५३ लाख ७८ हजार रुपैयाँ राजस्व सङ्कलन गरेको थियो । त्यसबेला निर्धारित लक्ष्यको ९७.१४ प्रतिशत मात्रै हासिल भएको थियो । चालु आर्थिक वर्षको सोही अवधिमा भने लक्ष्यभन्दा बढी राजस्व उठेको छ ।
गत वर्ष साउनमा ९ अर्ब २९ करोड ४३ लाख, भदौमा ९ अर्ब ४३ करोड ९२ लाख र असोजमा ९ अर्ब २८ करोड ६७ लाख रुपैयाँ राजस्व सङ्कलन भएको थियो ।
भैरहवा भन्सार कार्यालयका सूचना अधिकारी उद्धव ढुंगानाले अघिल्लो वर्ष विभिन्न कारणले राजस्व लक्ष्य भेट्न कठिन भएको भए पनि यस वर्ष बजारको अवस्था र आयातमा भएको वृद्धिले सङ्कलन बढाएको बताए ।
उनका अनुसार चाडपर्वका कारण बजारमा आर्थिक गतिविधि विस्तार हुने भएकाले आगामी कात्तिक र मंसिरमा पनि राजस्व सङ्कलन लक्ष्यभन्दा माथि रहने अपेक्षा गरिएको छ ।
आयातमा विद्युतीय सवारीको योगदान, निर्यातमा भटमासको तेल अगाडि
भैरहवा भन्सारबाट हुने आयातमध्ये पेट्रोलियम पदार्थ, सवारीसाधन, एलपी ग्यास तथा उद्योगका लागि आवश्यक कच्चा पदार्थ राजस्वका प्रमुख स्रोतका रूपमा देखिएका छन् । पछिल्लो समय विद्युतीय कार र पिकअप गाडीले पनि राजस्व योगदानमा महत्त्वपूर्ण स्थान बनाउन थालेका छन् ।
कार्यालयको तथ्याङ्कअनुसार चालु आर्थिक वर्षको पहिलो तीन महिनामा राजस्व योगदानका आधारमा प्रमुख आयातित वस्तुको सूचीमा विद्युतीय कार, पिकअप गाडी, पेट्रोल, मोटरसाइकल, एलपी ग्यास, शुद्ध फलाम र मोबाइललगायतका वस्तु परेका छन् ।
वस्तुको आयात संख्या बढी हुँदैमा राजस्व योगदान पनि बढी हुन्छ भन्ने हुँदैन । भन्सारको सूची भने आयातित वस्तुले सरकारी राजस्वमा पुर्याएको योगदानका आधारमा तयार गरिएको हो ।
यसअघि एलपी ग्यासले भैरहवा भन्सारको राजस्वमा महत्त्वपूर्ण हिस्सा ओगट्दै आएको थियो । अहिले विद्युतीय कार र पिकअपलगायतका सवारीसाधन पनि राजस्वका प्रमुख स्रोतका रूपमा देखिन थालेका छन् ।
निर्याततर्फ भने प्रशोधित भटमासको तेलको वर्चस्व कायम छ । साउन, भदौ र असोज तीनै महिनामा मूल्यका आधारमा सबैभन्दा बढी निर्यात हुने वस्तु प्रशोधित भटमासको तेल बनेको भन्सार कार्यालयको तथ्याङ्कले देखाएको छ ।
त्यसबाहेक खैरो सिमेन्ट, फलामे पाता, खयरको कत्था र जडीबुटी पनि प्रमुख निर्यातजन्य वस्तुको सूचीमा छन् । सूचना अधिकारी ढुंगानाका अनुसार साउन महिनामा चाउचाउ, प्लास्टिकका कच्चा पदार्थ र खोटोबाट उत्पादित रोजिनसमेत निर्यात भएको थियो ।
आयाततर्फ सवारीसाधन, पेट्रोलियम पदार्थ र औद्योगिक कच्चा पदार्थको योगदान उल्लेख्य देखिँदा निर्यातमा प्रशोधित भटमासको तेलले निरन्तर अग्रता कायम गरेको छ । यसले नेपालको निर्यात व्यापारमा उक्त वस्तुको महत्त्वपूर्ण भूमिका रहेको देखाउँछ ।