काठमाडौं । नेपाल आयल निगमले देशभर सञ्चालनमा रहेका एलपी ग्यास उद्योगलाई एकीकृत गर्ने योजना अघि सारेको छ। विभिन्न ब्रान्डमा सञ्चालित उद्योगलाई आपसमा गाभ्ने नीतिलाई कार्यान्वयनमा लैजान निगमले उद्योगीहरूसँग प्रक्रिया सुरु गरेको हो।
चालु आर्थिक वर्ष २०८३/०८४ को स्वीकृत नीति तथा कार्यक्रमको बुँदा नम्बर ३२ मा ग्यास उद्योग एकीकरणसम्बन्धी व्यवस्था गरिएको छ। सोही नीतिअनुसार हाल सञ्चालनमा रहेका ५८ वटा ग्यास उद्योगलाई गाभ्ने विषयमा निगमले पहल थालेको जनाएको छ।
निगमले कात्तिक १२ गते सबै उद्योगलाई पत्र पठाउँदै एकीकरणको नीतिलाई सहयोग गर्न र त्यसका लागि आवश्यक कार्ययोजना तयार पार्न आग्रह गरेको छ। उद्योगहरूलाई आपसी समन्वयमा प्रक्रिया अघि बढाउन पनि निगमले अनुरोध गरेको छ।
उद्योगको एकीकरणबाट ग्यास आपूर्ति तथा वितरण व्यवस्थापन प्रभावकारी हुने निगमको विश्वास छ। यसले बजार प्रणालीलाई व्यवस्थित बनाउनुका साथै उपभोक्ताले सहज रूपमा सेवा प्राप्त गर्ने वातावरण निर्माणमा सहयोग पुग्ने अपेक्षा गरिएको छ।